ليه مينفعش يكون الفريق الشاذلي المرجع الوحيد لينا لمعرفة تفاصيل حرب اكتوبر ؟!

.
انا شخصيا عاشق للفريق الشاذلي – رضى الله عنه و رفاقه وتقبل منهم – وله مكانة خاصة في قلبي .. لكن الموضوع ملوش علاقة بالعاطفة ..
ببساطة الحرب شهدت خلاف بين القادة .. كل قائد قدم وجهة نظره الخاصة .. نفس الاحداث بنفس التفاصيل لكن تناول احدهم لها غير تناول الاخر تماما ..
.
فمثلا .. الفريق الشاذلي شايف ان السادات كان سبب في الثغرة ..
جمال حماد شاف ان الشاذلي واحمد اسماعيل هم السبب لان اى تقدم اضافي كان لازم يتم خلال اول 3 ايام من الحرب في ظل انشغال سلاح الجو الاسرائيلي في معاركه في سوريا.
تيجي للواء اركان حرب احمد اسامة هتلاقيه بيقولك السبب الشاذلي والسادات .. وملخص كلامه عنهم ان اللى دار بينهم لعب عيال في وقت مينفعش فيه يحصل الكلام دا والتخبط اللى حصل كان نتيجة انضمام مدنيين للمقاومة .. لا وقالك كمان ان الثغرة دى حوار فاكس كان هدفه دعائي بالمقام الاول لرفع معنويات الجيش الاسرائيلي ..
.
كلام الاطراف التلاتة دول عن نفس الحادث .. بنفس التفاصيل .. متخيل ؟!
.
.
بلاش دي .. خليني اسألك كدا .. مين اللى عمل خطة العبور ؟!
الاجابة المشهورة .. الفريق الشاذلي ..
بس تعرف انها مش محل اتفاق ؟! تعرف مثلا ان وزير الحربية اللى عزله السادات بعد احتدام الخلاف بيهم .. الفريق اول محمد حاخوا .. قالك ان خطة العبور اتعملت في عهد ناصر وكان اسمها جيرانيت 1 و 2 ؟! وان سبب خلافه مع السادات انه اتمايع في تطبيقها واخرها ؟! بالمناسبة .. العظيم دا هو مهندس حرب الاستنزاف .. الحرب اللي مفروض يتم تدريسها قبل حتي العبور ..
طب تعرف ان فيه رواية تانية بتقول ان خطة المآذن العالية عرضها الشاذلي مع جرانيت 2 لما احمد اسماعيل تولي قيادة الجيش .. وبعدين استقروا علي المآذن العالية ..
من ناحية تانية الجمسي قالك المآذن العالية مكانتش كفاية وكان لازم نسيطر علي المضايق فتم تعديل خطة جيرانيت 2 بتاعة ناصر ودمجها مع المآذن العالية و طلعنا بالعملية بدر (( اسم خطة العبور )) ..
.
.
فيا عزيزي .. اكبر جريمة ممكن ترتكبها في حق نفسك انك تلغي عقلك وتتبني رأي واحد لمجرد انك مغرم بصاحبه ..
اما جريمة التسفيه من انتصار جيش المسلمين علي جيش اليهود .. فدي جريمة في حق بلدك وامتك ودينك .. جريمة في حق جيش عبر وفق خطة اسمها ((بدر)) ومتسلح بكلمة ((الله اكبر)) وبذل دمه علشان انت تيجي وعينك مفيهاش الكسرة اللى جدودك شافوها في 67.. فاتق الله ..