“خطيبتك هتموت مقتولة قبل نهاية الشهر ده”
ده اللي قالته الست النصابة وهي بتبص في عنيا بصة غضب شديدة, كنت في جنينة الحيوانات انا وواحد وصاحبي, ولقينا الست دي في وشنا وبتقولنا تعالوا اقرأ لكم الكف, طبعا انا بصتلها بغضب شديد وقولتلها:
“بعيد عنك احنا ناس تعرف ربنا”
لقيت وشها اتغير وقالتلي:
“يعني انا معرفش ربنا”
قولتلها
“أعتقد كدا, لأنك لو تعرفيه مش هتشتغلي في الدجل ده”
لقيت صاحبي بيحاول يهدي الموضوع وبيقولها
“خلاص خلاص انا عايز اقرأ الكف”
بصتله بغضب شديد بس هو غمزلي وابتسم, لقيتها فتحت ايديها عشان يحطلها فلوس, حطلها اتنين جنيه لقيتها بتقوله
“حط تاني خليني اقرأ القريب والبعيد..
لقيته زودلها 3ج كمان..
مسكت ايده وبدأت تسمع الكلام اللي هي حفظاه..
“هتقابل بنت الحلال اللي هتسعدك, هيتفتحلك باب خير كبير اوي وهتتجوز وتخلف واد زي القمر, الفلوس هتكتر في ايدك والرزق هيزيد”
بصيتلها بصة سخرية وابتسمت ابتسامة كبيرة, بصتلي بتحدي كبير وقالتلي:
- مش ناوي تقرأ الكف, وهعملك ده مجانا
- لا يعلم الغيب الا الله يا ست الحسن والجمال
لقيتها بصت في ايدي وبالأخص لمكان الدبلة وقالتلي:
- انت خاطب بقا
- وانتي مالك أصلا
لقيتها بتقرب مني واحدة واحدة وقالتلي في ودني بصوت شبيه بالهمس:
- خطيبتك هتموت مقتولة قبل نهاية الشهر ده
وقبل ما استوعب كلامها قامت وخزاني بإبرة حادة في دراعي, حسيت بألم شديد وصرخت فيها بغضب:
- انتي متخلفة يا ست انتي
وحاولت اهجم عليها بس صاحبي شدني ومشينا, وطول مانا ماشي كانت بتبصلي بصة غامضة جدا جدا..
وللأسف كلامها أثر فيا اوي, خلاني غصب عني ابص في التاريخ, كان يوم 15 في الشهر, بالليل اتصلت بيا خطيبتي وفضلنا نتكلم كتير, كأنها كانت وحشاني اوي, تجاهلت بصعوبة شديدة اني احكي لها اللي حصل عشان مخوفهاش, خاصة اني مفترض ابقا مصدر الأمان ليها..
قفلت معاها ودخلت انام بس بدأت احس بوغزة في مكان الابرة اللي شكتني بيها الست, وغصب عني بدأت احك في دراعي كأنها حساسية مفرطة, قمت وجبت تلج عشان احطه على مكان الابرة عشان المكان يتخدر شوية, بس لا حياة لمن تنادي, تقريبا كنت ناقص اجيب خنجر احك بيه دراعي من كتر ما كان بياكل فيا..
وبدأت وقتها احس بحرارة على كتفي وصداع شديد, عارف لما تكون واقف وضهرك للفرن, اهو ده كان نفس احساسي, والصداع كان بيزيد جدا..
في النهاية نمت, نمت من الارهاق والتعب, وفي نومي كنت شايف نفسي في ارض ملتهبة, كأنك جمب فوهة بركان ثاير, نار عمالة تتطاير حوليا والمكان كله سخن, الأرض نفسها عليها حمم بركانية والنار كأنها بتجري ورايا انا مخصوص..
صحيت بعد ما حسيت ان جسمي اشتعل باللهب وبدأ يتحرق بالفعل, كنت تقريبا عايم في بحيرة من العرق وقلبي بيدق زي المدفع, ريقي ناشف زي الأرض الصحراوية وجسمي كله منمل..
ومن وقتها بدأ يلازمني احساس الحرارة اللي في ضهري دي, كأن فيه فرن مولع فوق كتفي, مبقتش عارف اعمل ايه, هروح لدكتور ولا لشيخ ولا ممكن يكون حصل ايه أصلا..
واستمرت الكوابيس الغريبة دي كلها, وكلها بتصب ناحية النار, مرة بركان, مرة الاقي نفسي بغرق في رمال سخنة في الصحرا, مرة اتحرق في قلب الشمس, مرة السما تمطر حمم بركانية.. وهكذا..
بعد ايام كلمتني خطيبتي وحست من صوتي اني تعبان, وصممت اننا نتقابل عشان تعرف مالي, وبالفعل اتقابلنا في كافيه بعد ما استأذنت والدها, كانت حالتي فعلا صعبة, بحك جسمي بطريقة غريبة وعنيا شاردة وتحتها اسود من قلة النوم..
ووسط شرودي لقيت خطيبتي لمست ايدي عشان تفوقني, بصتلها بابتسامة و
في اللحظة دي لقيتها اتألمت اوي, بصيت لها بتعجب لقيت صباعها اتعور بسبب ابرة كانت في الكرسي اللي قاعدة عليه, لفيت صباعها بمنديل وناديت على العامل وثورت فيه, من ضغطي وعصبيتي كنت هضربه, انتوا ازاي تحطوا دبابيس في الكراسي, اعتذر جدا جدا وخدتها ومشيت..
وانا ماشي اعتذرت للعامل لأني فعلا تهورت اوي وهو ملوش ذنب في ده أكيد, وروحت, تاني يوم كلمتني خطيبتي وبدأت تقولي ان مكان شكة الابرة بياكل فيها زي الحساسية وان فيه صداع قوي ملازمها من امبارح..
وكانت الصدمة, لاني اكتشفت ان الصداع والحكة راحوا من عندي فعلا من امبارح, بقيت هتجنن حرفيا ومش فاهم ده ايه أصلا..
هو مرض مثلا بيتنقل, وبعدين هل عشان قعدت معايا يبقا المرض يتنقلها, حاولت اهديها وقالتلي انها هتروح تكشف مع والدها, وغصب عني اعصابي فلتت وكسرت الكوباية اللي جمبي..
حاولت اربط المواضيع ببعض واحدة واحدة, واحدة دجالة قابلتني, وشكتني بإبرة, وقالتلي خطيبتك هتموت مقتولة قبل نهاية الشهر, وبعدين تحصلي اعراض ويصادف اني يوم ما اقعد مع خطيبتي تتنقل لها الاعراض دي, بس في النهاية موصلتش لأي حاجة..
بالليل اتصلت بيا وقالت ان الدكتور كتبلها على مرهم ومسكن قوي وهتاخده وتنام, وقررت انا كمان انام, بس المرة دي كان الموضوع صعب جدا..
انا شوفت وانا نايم اني طاير في الاوضة وشايف جسمي ممدد على السرير, بس مكنتش لوحدي, كان فيه كائن بشع عامل زي القرد قاعد جمبي على السرير, وكان عمال يخربش في جسمي بمخالبه, المشهد خلاني اقع في حالة من الرعب موصلتلهاش في حياتي, حاولت اصحى من نومي مقدرتش, كنت زي المشلول, المشلول اللي شايف حد ماسك في ايده سكينة وجاي يقتله بس هو اخره انه يتفرج على نهايته..
الغريب ان المشهد اتغير ولقيت نفسي في اوضة خطيبتي, شوفتها وهي نايمة وشوفت كائن تاني بيلمس جسمها وهي نايمة, كأنه بيتحرش بيها لأنه بيختار اماكن حساسة في جسمها..
وهي بدأت تتحرك بعنف وهي نايمة كأنها بتتألم, وقتها حسيت بنار بتاكل فيا من الغضب, حسيت بعجز رهيب, فضلت اصرخ جوايا عشان اصحا, اصرخ واصرخ وفي النهاية صحيت, أول ما صحيت اتصلت بيها فورا, استنيت كتير لحد ما ردت, قولتلها اني بطمن عليها بس, وخلعت قلبي لما قالتلي انها كانت بتشوف كابوس غريب..
في النهاية سبتها تنام, وتاني يوم اتصلت بيها بس تليفونها كان مغلق, حاولت طول اليوم بس معرفتش اوصلها, اتصلت بوالدها طمني انها بخير بس تليفونها بطاريته باظت, مرضتش احرج نفسي معاه لما اقوله هات اكلمها وكدا وسكت, خاصة انه مكنش حابب وجودي كخطيب لبنته وشايفني مش اد المسؤولية..
بالليل شوفت في نومي حلم جديد, بس كان الاسوأ على الاطلاق, شوفت خطيبتي مرمية على ارض والدم بينزل من راسها بغزارة وجسمها عمال يتنفض, وكان الكائن واقف يبص علينا من بعيد, كنت في الحلم بزوم زي الحيوان من الوجع اللي فيا, بصيت للكائن عشان اسمع صوت بيتردد جوايا
“قبل نهاية الشهر”
صحيت مفزوع وبصيت في التاريخ لقيت انهاردة 30 في الشهر, ويصادف ان الشهر ده 30 يوم بس, يعني اخر ليلة, حسيت انها في خطر كبير, وبدأت نوعا ما اصدق كلام العرافة, روحت على بيت خطيبتي اللي كانت كويسة نوعا ما وفضلت قاعد هناك, استغربوا من اني جاي من الصبح وقاعد طول الوقت ده بس محدش وضحلي ده..
اتغديت معاهم وفضلت قاعد مبتحركش, في النهاية وعلى العشاء والدتها قالتلي انها عايزة شوية حاجات ولو ينفع انزل اجبها, وطلبت خطيبتي تنزل معايا لانها مخنوقة وزهقانة وكمان هتودي هدوم ليها للترزي..
نزلنا انا وهي وانا لسة قلقان مش عارف ليه, روحنا للترزي لقيناه قافل واضطرينا نتمشى كتير عشان نروح لواحد تاني, وصلنا للراجل وبدأت اتكلم معاه وخطيبتي قالتلي انها هتشتري حاجة من المحل اللي الناحية التاني, وقبل ما اعترض كانت مشيت, وفي لحظة سمعت صرخت رهيبة..
بصيت ورايا وانا بقول يارب ما تكون هي, بس للأسف كانت هي, وهي بتعدي الشارع جت عربية وشاطتها يجي تلاتة متر, جسمي كله اتشل وقتها, وقفت مكاني مصدوم مبتحركش, الناس كلها جريت عليها وانا واقف مكاني, دموع الصدمة نزلت من عنيا بس جسمي مكنش بيتحرك..
قربت زي الانسان الالي ناحيتها لقيتها مرمية على الاسفلت والدم نازل من راسها وعنيها جاحظة من الألم, ووسط شرودي وصدمتي لمحت كائن شبيه بالقرد على اخر الطريق واقف, حسيت انه مبتسم, وبعدها اختفى تماما..
في اللحظة دي كانت الناس بتشيل خطيبتي وبيحطوها جوة عربية الراجل اللي خبطها, ركبت العربية اللي طارت ناحية اقرب مستشفى, بدأت نوعا ما افوق واستوعب الموقف, اتصلت بابوها وبلغته بالموضوع وكنا وصلنا للمستشفى..
الطوارئ استقبلتها فورا وبعد نصف ساعة بس اتنقلت لغرفة الجراحة لان حصلها كسر في كذا ضلع وارتجاج في الجمجمة, كنت قاعد على اعصابي مش قادر اتحرك, كذا دكتور وصل وبدأ يدخل غرفة العمليات وكان فيه توتر كبير, توتر يقولك ان الموضوع صعب جدا..
وغصب عني بصيت للساعة اللي كانت قربت على 12 بالليل, وافتكرت كلام الست
“خطيبتك هتموت قبل نهاية الشهر”
القصة للكاتب: أحمد محمود شرقاوي
ونهاية الشهر باقي عليها نص ساعة, في اللحظة دي خرجت ممرضة من اوضة العمليات ووشها اصفر خالص, بصتلي وهي بتقول
“الحالة بتلفظ انفاسها الاخيرة, ربنا يتولاها برحمته”
لقيت نفسي بجري على الحمام, اتوضيت وجبت مصلية من التمريض ودخلت اوضة فاضية, فرشت المصلية وبدأت ابكي وابص للسما, ابكي بهيستريا شديدة
قولتله
” يارب, انت مش رسولك قال كذب المنجمون ولو صدفوا, فيارب حتى لو كان ده قدرها بلاش يكون ده السبب, بلاش تموت بناء على كلام واحدة بتتحداك في ملكك وبتدعي انها بتعرف الغيب, يارب الأمر أمرك وانا وكلتك, وان كان هذا قدرك فدعائي سيغير قدرك, يارب”
وانهرت في البكاء, انهرت لدرجة اني سمعت صوت ابوها بيبكي برة بهيستريا لما حد بلغوا انها ماتت, بس انا كملت دعائي, كملت وكملت, فضلت اردد
“كذب المنجمون ولو صدفوا”
“كذب المنجمون ولو صدفوا”
وفي النهاية سمعت صوت تكة الساعة, الساعة بقت 12, في اللحظة دي بس خرج الدكتور وقال لابوها اللي بيبكي..
“سبحانه رب المعجزات القلب اشتغل تاني والحالة بتستقر نوعا ما”
وقتها بس وقعت من طولي واغمى عليا تماما..
أحمد محمود شرقاوي
…………………..
من فضل الله انها مجرد ايام وربنا قومها بالسلامة, وابوها احترمني اوي لما شاف موقفي في المستشفى وتأثري باللي حصل ليها, بدأ يقتنع بيا ويحترمني جدا من يومها, بس انا كنت محتاج تفسير لكل اللي حصل ده, وبعد اسبوع كنت قاعد مع شيخ بحكيله اللي حصل, وقالي الاتي..
كلهم فعلا دجالين يابني, بس فيهم اللي مجرد نصاب, ومنهم اللي بيتعامل مع الشيطان, وتعامله مع الشيطان عشان وقت قراءة الكف الشيطان يخليه يقول كلام مناسب على هوا الشخص, عشان كدا لما قرأت لصاحبك قالتله انك هتتجوز وهتجيلك فلوس, لان ده اللي كان بيتمناه فعلا, بس انت لما تحديتها هي عملت فيك نوع من انواع السحر بواسطة الابرة دي, وهي بتوكل عليك شيطان لهدف معين, موت, خراب, مرض ايا كان..
والشيطان ده قدر يتنقل منك لحطيبتك عشان ينفذ طلبها, ان خطيبتك تموت, طبعا هما مجرد أسباب والموت والحياة في ايد ربنا, بس هو بيبقا سبب قوي انه يخلي عربية تفقد سيطرتها في الوقت اللي خطيبتك بتعدي فيه الشارع عشان تخبطها, بس دعائك وقف حائل كبير يابني وربك استجاب ليك, وحقك ربنا هيردهولك فسلم اقدراك ليه وقول الحمد لله, ومتقلقش نوع السحر ده بيكون مرتبط بمدة زمنية, والشهر خلص خلاص..
في النهاية يابني اوعى تنسى
“كذب المنجمون ولو صدفوا،،
التعليقات مغلقة.