اولا انا هنا هذا المقال يعرض وجهه نظر بعض الاشخاص ولا يعبر عن رأيي الشخصي
بما أنه الكلام كله حاليا عن نهاية العالم إيه رأيكم نتكلم بالتفصيل عن النظرية اللي بتقول ان زوال الكيان الصهوني هيكون في سنة 2022 بالتحديد!
طب على أي أساس اتقال واتحدد الكلام ده ؟ على أدلة من القرآن الكريم واتعمل فيها أبحاث كتير ومجلدات من سنة 92 لحد وقتنا الحاضر….المقال ده هيكون طويل جدا ومليان تفاصيل كتير ومحتاج تركيز ومخمخة منك عشان توصلك المعلومات اللي فيه وفي النهاية شوف هتقتنع بالنظرية دي ولا هتعتبرها مجرد مصادفات رقمية ليس أكثر.
بداية البحث في الأمر كانت سنة 92 عن طريق عالم دين عراقي اسمه راشد مشهور طب على أي أساس بدأ البحث بتاعه ده ؟ على قصة حصلت قدامه وهو طفل صغير بالتحديد سنة 48 يوم 15 مايو يوم النكبة اليوم اللي تم الإعلان فيه رسميا عن قيام دولة إسرائيل.. عشان يفاجئ الطفل راشد بجارتهم اليهودية جاية بتبكي وبتنتحب لما سمعت الخبر فاستغربوا رد فعلها لأنها المفترض تكون سعيدة بحاجة زي دي لأنه المعلن وقتها ان هدف الدولة الوليدة دي أنها تكون وطن قومي لليهود لكن لقيوها بتقول لا دي هتكون سبب في نهايتنا وفنائنا كلنا كهود ومش هتستمر غير 74 سنة بس!
بداية الموضوع معايا لما كنت صغير سمعت تصريح من الشيخ أحمد ياسين زعيم مقاومة حماس الفلسطينية واللي استشهد على كرسيه المتحرك بيقول فيه وبكل ثقة انه واثق وموقن ان نهاية الكيان المغتصب ده هتكون في سنة 2022! طب هو جاب الثقة دي منين بقى ومنين جاب الرقم ده بالذات ليه مش قبلها ولا بعدها مثلا ؟ معرفتش لكن لما كبرت بحثت في الأمر لحد ما وصلت للقصة اللي هحكيها دلوقتي بالتفصيل الممل.
راشد مشهور بيقول ان كلامها يحمل شقين الشق الأول وارد يكون مجرد رأي سياسي وتحليل للموضوع من وجهة نظرها عادي لكن اللي مش عادي هو الجزء الثاني من كلامها وهو الرقم اللي محدداه واللي صعب يكون مجرد رأي او توقع طب هي جابته منين ؟ أكيد من كتابها المقدس اللي بتؤمن بيه اللي هو التوراة!
طب احنا كمسلمين مؤمنين بان التوراة محرفة فازاي هنصدق معلومة زي دي ؟ لا ركز بالله كلمة محرفة مش معناها ان موضوعة او مختلقة لا معناها ان فيه نصوص تم حذفها نصوص تم تبديلها نصوص تم تغييرها ونصوص ما زالت زي ما هي ووارد تكون النبوءة بتاعة الست دي من الجزء اللي متمش تغييره ده…
لكن الشيخ راشد لما بدأ بحثه قرر ان يعتمد على مصدر موقن بصحته مليون في المئة وأن كل حرف فيه صادق ومتمش التلاعب فيه وفوق كل ده من عند ربنا عز وجل اللي هو القرآن الكريم ويشوف هل المعلومة دي هتوصله لحاجة ولا لا ومن هنا بدأ بحثه.
وقبل ما يبدأ بحثه كان معروف ومنتشر في الوقت ده الإعجاز العددي في القرآن الكريم واتعمل فيه أبحاث كتير ومجلدات وعشان تفهم الموضوع ده هشرحولك بمثال بسيط وشهير.
كلنا عارفين سورة الكهف وقصة أهل الكهف طبعا ؟ تمام لو جبنا الآية اللي بتقول
( ثم بعثناهم لنعلم اي الحزبين أحصى لما لبثوا امدا) وبعدين روحنا للأية اللي بتحدد فترة مكوثهم نيام في الكهف ( ومكثوا في كهفهم ثلاث مائة سنين وازدادوا تسعا)
لو انت عديت الكلمات من أول كلمة لبثوا اللي في الآية الأولى لحد لبثوا اللي في الآية التانية هتلاقيهم 309 كلمة!!
ولو عديت الكلمات من أول كلمة لنعلم لحد كلمة تسعا هتلاقيهم برضو 309 كلمة.. نفس عدد السنين اللي ربنا أخبرنا ان أهل الكهف مكثوها في الكهف.
طبعا الموضوع ده موقفش لحد هنا وفيه قرائن عددية كثير في السورة اتعمل عليها أبحاث وكتب فمتجيش تقول دي مجرد صدف لأن ربنا عز وجل ما بيقولش صدف تعالى الله علوا كبيرا ( وكل شيء فصلناه تفصيلا)
نرجع بقى لموضوعنا الأساسي بعد ما عرفنا موضوع الإعجاز العددي في القرآن الكريم واللي زي ما ورد في اكتر من موضع وارد جدا يكون موجود في مواضع أخرى بس اللي يبحث ويدور وده اللي بدأ يعمله الشيخ راشد بالظبط.. طب هيبدأ منين ويدور على إيه بالظبط.. فكان محتاج خيط يبدأ منه وبالفعل من كلام الست جارتهم عمل خيط بسيط بدأ منه
بما ان الست قالت 74 وبحسبة بسيطة في الفرق بين السنة الميلادية والهجرية لقى ان ال 74 سنة هيوازوا 76 سنة هجرية.
يعني سنة 1948 لو ضفنا عليهم ال 74 هيدوك 2022
ووقتها كانت السنة الهجرية 1367 لو ضفنا عليهم 76 هيدوك 1443
وده الخيط اللي بدأ منه رقمين قدامه اهو يدور في القرآن ويشوف هيوصل لحاجة منهم ولا.. طب هيدور فين ؟ طبيعي انه يدور في قصة موسى وبني إسرائيل اللي اتذكرت بكثرة في مواطن عديدة وبالفعل بدأ بحثه واكتشف اول حاجة غريبة.
بحث في صورة الإسراء ( خلي بالك اللي أتذكر فيها المسجد الأقصى) من الآية التانية فيها اللي مطلعها ( وأتينا موسى الكتاب…) لحد نهاية القصة ( فإذا جاء وعد الآخرة جئنا بكم لفيفا ) وركز في الكلام والمعنى والوعد.
فعمل حاجة بسيطة قرر يعد الكلمات من اول اتينا لحد لفيفا تفتكروا لقاهم كام كلمة ؟ لقاهم 1443!!
ايه نوع الصدفة اللي يخليه يلاقي رقم هو كان منتظره في البداية ؟ ومن هنا استمر البحث بتاعه عشان يكتشف أمور مذهلة.
رجع للأية اللي في سورة المائدة اللي بيقول فيها الله عز وجل على لسان سيدنا موسى ( يا قوم أدخلوا الأرض المقدسة…) وطبعا الأرض المقدسة هنا هي فلسطين حاليا وقرر الشيخ يعد عدد الآيات من أول الآية لحد ما وصل للأية اللي في سورة الإسراء اللي بتقول ( فإذا جاء وعد الآخرة جئنا بكم لفيفا) لقاهم كام آية ؟ 1443 آية برضو… الموضوع مش صدفة بقى واستمر البحث بقى ووصل للحقايق الجاية.
بس قبلها لازم يبقى عندك خلفية عن حاجة في اللغة العربية اسمها حساب ( الجُمّل ) بضم الجيم وتشديد الميم وده باختصار ومع ترتيب الحروف العربية الترتيب الابجدي ( أبجد هوز… الخ) بيرمز لكل حرف برقم يعني اول 9 حروف في الترتيب بياخدوا أرقام من 1 ل 9 يعني الألف 1 الباء 2 وتاني 9 حروف بباخدوا أرقام من 10 ل90 واخر 10 حروف بياخدوا من 100 لألف عشان المجموع يكون 28 حرف كل حرف بيدل على رقم… طب ده فايدته إيه ؟ كان العرب بيستخدموه قديما كنوع من البلاغة والبراعة يعني واحد مات بتاريخ معين يكتبوا على قبره بيت شعر حساب الجمل بتاعه يديك التاريخ ده بالتحديد ( حاليا بيتم استخدام الموضوع ده في السحر والشعوذة والمتخصصين أكيد مر عليهم حاجة زي دي)
وبما ان القرآن نزل بلسان العرب ونزل يتحداهم في بلاغتهم وفصاحتهم فأكيد القرآن موجود فيه حساب الجمل ده وبالفعل فيه عشرات الأمثلة على ده من القرآن وده آللي كان عارفه الشيخ راشد وقرر يستخدم الموضوع ده في بحثه ويشوف هيوصلوا لايه بالظبط.
في البداية عمل حساب جمل للأية ( فإذا جاء وعد الآخرة جئنا بكم لفيفا) لقى المجموع بيديه 2022!!
طب الآية اللي بعدها بتقول ( بالحق أنزلناه وبالحق نزل)
بما انت ترتيب كلمة لفيفا هو 1443 فكلمة بالحق ترتيبها 1444 وأنزلناه ترتيبها 1445 وبالحق ترتيبها 1446 ونزل ترتيبها 1447 لو جمعنا ال 4 أرقام دي هيديك كام ؟ 5782 طب وإيه الرقم ده ؟ دي السنة العبرية سنة 2022 !!
طبعا لما لقى التاريخ الهجري والميلادي والعبري بيلتقوا في نقطة واحدة قالك يبقى الموضوع يستحق البحث فعلا وطبعا ده مش دليل على حاجة وقتها وفعلا بدأ هو وناس كثير في البحث وتوصلوا لحاجات مشابهة كتير ومعطيات لا يكفيها كتاب ولا اثنين ولا عشرة هذكر منها بعض الأمثلة منعا للتطويل.
لازم تبقى عارف ترتيب الآيات في القرآن الكريم وان كل آية ليها رقم معين في القرآن بعيد عن رقمها في السورة يعني مثلا الآية رقم واحد في سورة البقرة ترتيبها 8 لأن قبليها 7 آيات بتوع الفاتحة… طب الآية 20 من سورة البقرة ترتيبها كام ؟ 27 …وهكذا لحد اخر آية في القرآن.
والموضوع ده برضو مش عبثي ولا مجرد ترتيب عادي ده فيه أبحاث معمولة عن ترتيب آيات معينة ودلالات الترتيب ده لكن مش موضوعنا برضه ونرجع لموضوعنا.
نرجع لأول آية من سورة الإسراء ( سبحان الذي أسرى بعبده ليلا من المسجد الحرام إلى المسجد الأقصى…) لو عملنا حساب جمل لكلمة المسجد الأقصى دي هيدينا الرقم ده ( 361)
لو روحنا للأية 361 من حيث الترتيب في القرآن ونشوف حساب الجمل بتاعها وايه دلالته لاقينا الرقم الناتج عبارة عن مجموع لتلات أرقام هما ( 636 + 1187+ 2022 )
طبعا عارفين 2022 طب الرقمين التانيين دول أيه ؟
الرقم الأول 636 ده تاريخ فتح بيت المقدس على يد عمر بن الخطاب
الرقم التاني 1187 تاريخ إعادة فتح بيت المقدس على يد صلاح الدين الأيوبي!
يبقى احتمالية الرقم التالت انه يكون تاريخ حاجة محصلتش بنفس الحدث إيه ؟
نرجع لأول آية في سورة الإسراء لو خدنا بعدها 361 وبعدين 636 فتح عمر وخدنا 1187 فتح صلاح الدين هيفضل كام آية عشان القرآن يختم ؟ 2022 آية
في آية في القرآن بتقول (…وجعلنا الليل والنهار آيتين ، فمحونا آية الليل وجعلنا آية النهار مبصرة لتبتغوا فضلا من ربكم ولتعلموا عدد السنين والحساب )
آية بتورينا أهمية الحساب دي ترتيبها في القرآن رقم عبارة عن مجموع 3 أرقام ( 15+ 583 + 1443 )
ال 15 هجرية فتح عمر
ال 583 هجرية فتح صلاح الدين
ال 1443 يوازي 2022 !!
في النهاية الأمثلة الدالة ع النبوءة دي كثير ومش معناها انها لازم تحصل بنسبة 100 في المئة دي اجتهادات شخصية من بشر وانا وضعتها قدامكم وأنت حر تاخد الكلام ده بمحمل جد او تشوفه خاطئ… مش بفرض عليك شيء.
طبعا المقال طويل جدا فلو وصلت لهنا فيبقي كتر خيرك وارجو منك تقدير المجهود المبذول بيه والدعم بالشير والمنشن وابداء رأيك في التعليقات وبلاش نسخ المقال ونقله في مكان آخر بعد إذنكم فأنت لو ماقتنعنتش بالكلام ده فأنت أكيد استفدت معلومة .
وتعالوا ناخد المقال من زاوية أفضل وإنها دعوة لقراءة القرآن بتدبر اكتر وإنك متعتبروش مجرد كلام بتقراه وخلاص زيه زي اي كتاب وآسف جدا على الاطالة.
التعليقات مغلقة.