حقيقة ادعاء الفلسطينيين باعوا ارضهم

اطبع كام نسخة من المقال دا وابرمهم وشيلهم فى جيبك .. لما حد يقولك الفلسطينيين باعوا بلدهم انت عارف هتعمل ايه ..
.

.
هحاول اكون مختصر جدا ونتكلم كعادتنا فى نقاط :-
1- بداية الصهيونية كانت مطلب ملخصه ( أرض بلا شعب لشعب بلا أرض ) .. وبدأت رحلة البحث عن ارض غير مأهولة لتوطين اليهود فيها.
2- قبل النكبة ب 50:60 سنة تقريبا .. ماكس نودو القيادي الصهيوني من جيل المؤسسين بعت 2 حاخامات لفلسطين لبحث مدى ملاءمتها .. الاتنين كتبوا فى تقريرهم ( فلسطين عروس جميلة .. لكنها متزوجة بالفعل من رجل آخر ) .. يعني مطلعتش ( أرض بلا شعب ) ..
3- سنة 1891 اعيان القدس قدموا عريضة لصدر الدولة العثمانية ( رئيس الحكومة ) بيطالبوه فيها بسن قانون بيحظر هجرة اليهود الروس الى فلسطين وحظر تملكهم الاراضي ودا كان رد فعل لمحاباة ( رشاد باشا ) حاكم القدس اللى الصهاينة اشتروه بالفلوس وبدأ يستقبلهم ويهاديهم بأراضى وقفية و وطنية ( ملك للدولة و اوقاف الدولة ) ..
4- السلطان عبد الحميد .. رأس الدولة العثمانية .. كان له موقف مشرف جدا جدا فى التصدي للاستيطان وكتبت مقال من 4 سنين تقريبا بيحكي بالتفصيل عرض عيلة روتشيلد على قيصر ألمانيا سداد جزء كبير من ديونه واسقاط ن ديون العثمانيين فى مقابل توسطه عند الخليفة العثماني و قبوله بتوطين اليهود. ودا تسبب فى ازمة بين عبد الحميد و فيلهلم التاني لكن التاني بادر بالاعتذار وابقى علي علاقته الطيبة بالعثمانيين.
5- بالرغم من موقف السلطان عبد الحميد لكن الدولة العثمانية فى الوقت دا هيكلها الادارى كان اشد فسادا من ( مازر رشا ) .. واتعملت لعبة قذرة ملخصها ان حاكم القدس شد على الفلاحين فى الضرايب .. معظمهم عجز عن الدفع فسحب منهم الاراضى وباعها فى مزاد علني واللى اشتراها عدد من العائلات الاقطاعية اللبنانية منزوعة الدين والنخوة واشتروها بهدف اعادة بيعها لليهود بسعر مضاعف وتحقيق مكاسب خرافية ..
6- للاسف دا اللى حصل وبنهاية سنة 1918 اليهود امتلكوا 1.5% من ارض فلسطين ..

7- جه المستعمر البريطاني وبدأت عيلة روتشيلد وغيرها يضغطوا على الحكومة البريطانية من خلال ( الديون ) لاعطائهم جزء من فلسطين.
8- الانجليز لعبوا لعبتين اوسخ من بعض .. الاولى سيطروا على اراضي الاوقاف والاراضى الوطنية ( اللى هي ملك الدولة مش ملك حد ) وباعوا بعضها لليهود بأسعار تعبانة و بعضها اعطوها لليهود بلوشي .

9- اللعبة التانية هى اتفاقية سايكس بيكو .. قسموا الارض لـ 4 دول .. فلسطين وسوريا ولبنان والاردن .. وسبحان الله يا اخى متتحطش الحدود بين البلاد دى الا فى منتصف الملكيات الزراعية الكبيرة للعائلات .. وبعد التقسيم بقيت انت كراجل بيتك موجود فى لبنان وارضك موجودة فى فلسطين .. بين بيتك وارضك سلك شائك وجنود .. وريني بقى هتعدي من دولة لدولة ازاى .

10- دا اجبر كتير من العائلات على بيع اراضيهم .. مجموع الاراضي اللى تم بيعها بالطريقة دى لا تتخطي 1% من اجمالي ارض فلسطين.
11- مرت سنين وسنين لحد ما وصلنا للنكبة

1948 ..اليهود وقتها كانوا بيملكوا اقل من 4.5$% من مجموع اراضي فلسطين .. وعلى اسوأ تقدير من مراجع اليهود الخاصة بلغت النسبة 6% .. يعني تقريبا مساحة باب الشعرية مقارنة باجمالى مساحة القاهرة.
.
اطبع كام نسخة من المقال دا وابرمهم وشيلهم فى جيبك .. لما حد يقولك الفلسطينيين باعوا بلدهم انت عارف هتعمل ايه ..
.