7 أفلام أخرجها المخرج علي عبد الخالق وهما مش مجرد 7 أفلام هما عبارة عن 7 تحف فنية شادر السمك العار الكيف جري الوحوش إعدام ميت البيضة والحجر وبئر الخيانة

7 أفلام أخرجها المخرج علي عبد الخالق وهما مش مجرد 7 أفلام هما عبارة عن 7 تحف فنية (شادر السمك-العار-الكيف-جري الوحوش-إعدام ميت -البيضة والحجر -بئر الخيانة) كل الافلام دي مشتركة في صراع أخلاقي في نفس شخصية البطل وبيبقي الصراع دا بسبب غريزة الطمع وغالباً الطمع دا بيبقي في مال عن طريق غير مشروع في فيلم العار والكيف كان عن طريق المخدرات وفي فيلم بئر الخيانة وإعدام ميت كان عن طريق الخيانة للوطن وفي فيلم شادر السمك عن طريق الغش والجشع وفي فيلم البيضة والحجر كان عن طريق الدجل في كل فيلم بيبدأ فيه البطل وهو رافض للطريق الي حيمشي فيه وكمان بيكون فيه جزء من الخير لكن الشيطان يفضل يوسوسله ويحلل الحاجة الغلط في عينيه في فيلم العار بيموت الاب ويكتشف ولاده عن طريق أخوهم كمال أن كل فلوس ابوهم في صفقة مخدرات كمال اللي مريح ضميره ومقتنع أن تجارة المخدرات حلال ويبقي الصراع الفعلي في شخصيتين شكري وكيل النيابة ودكتور عادل اللي بيبقوا رافضين الصفقة في الأول لكن في النهاية طمعهم في المال بيحركهم، وشخصية منصور في فيلم إعدام ميت وجابر في فيلم بئر الخيانة اللي طمعهم في المال بيخليهم يخونوا وطنهم وفي فيلم الكيف اللي بنلاقي فيه شخصيتين مزاجنجي بعد فشله في الدراسة بيقرر العمل مطربًا في فرقة شعبية لإحياء الأفراح وبيكون مدمن علي المخدرات، فبيحاول شقيقه الكيميائي صلاح إقناعه بالإقلاع عن المخدرات فبيديله قطعة حشيش صُنعت في المعمل من مواد عطارة غير ضارة وينصحه باستخدامها وتقديمها لأصدقائه بدلًا من الحشيش، وتنال التركيبة إعجاب أحد تجار المخدرات، ويسقط صلاح أمام إغواء المال الذي يتوالى عليه بسبب تركيبته.والعامل البسيط أحمد في فيلم شادر السمك اللي بيقف جنب واحدة ست أرملة(جمالات)قدام جشع تجار السمك ويتجوزها لكن يغير مبادئه ويطمع في مالها ويبدأ يتاجر وبسبب طمعه في المال يبدأ يمارس نفس أساليب الاحتكار اللي كان بيمارسها تجار السمك ،ومستطاع مدرس الفلسفة في فيلم البيضة والحجر، اللي بيطرد من عمله بسبب اتهامه بالقيام بنشاطات سياسية وبيحاول يحارب الدجل والشعوذة لكن بعد كدا بسبب طمعه في الفلوس بيمشي في سكة الدجل والشعوذة مستغلًا ذكاءه العقلي وجهل المجتمع .وفي فيلم جري الوحوش سعيد أبو الدهب اللي بيطمع في الإنجاب فبيقترح عليه صديقه نبيل اللي بيطمع في المجد عملية زرع جزء من المخ بيبتبرع بيه عبد القوي اللي بيطمع في المال ،كل فيلم من دول كان فيه صراع بيدور بداخل كل شخصية من شخصياته ما بين الطمع وبين ضميره لكن قدام طمعه اللي بيفضل مسيطر عليه بيمشي وراء رغباته وفي النهاية غالبا البطل بيأخد عقابه نتيجة لطمعه دا عن طريق الانتحار زي ما حصل لجابر في فيلم بئر الخيانة وشكري وكيل النيابة في فيلم العار أو عن طريق القتل زي ما حصل لمنصور في فيلم إعدام ميت وأحمد أبو كامل في فيلم شادر السمك أو عن طريق الجنان زي ما حصل لدكتور صلاح في فيلم الكيف أو دكتور عادل في فيلم العار وعبد القوي شديد في فيلم جري الوحوش أو عن طريق الشلل زي سعيد أبو الدهب في فيلم جري الوحوش المهم كل شخصية بتاخد جزاءها في نهاية الفيلم والمخرج علي عبد الخالق قدر يعبر عن الصراع اللي بيحصل داخل كل شخصية والتطور اللي بيخليه يطمع وبسبب طمعه دا يضيع نفسه في طريق غلط.حرام مخرج زي على عبد الخالق مش بيخرج أفلام من 15 سنة ومخرجين موهبتهم قليلة وميعرفوش يخرجوا أعمال عبقرية زي أفلام علي عبد الخالق برغم الإمكانيات الكبيرة اللي متوفرلهم هما اللي شغالين في السوق دلوقتي.