الطرق الجديدة فى استدارج النساء

.
.
من فترة انتشرت اعلانات وبوستات ( مطلوب سيدات للعمل من المنزل بمرتب يصل الى 5000 جنيه شهريا وبدون خبرة وبدون تسويق ) ..
.
في الطريقة دي بيعتمد ( القواد ) علي حسابات وهمية قديمة ( علشان متتقفلش بسهولة ) .. بيشتري الحساب اللى اتعمل من 2012 مثلا بسعر 25 جنيه .. بيرمي البوست في جروبات التسويق وجروبات كل مدينة او قرية او حي .. الاماكن اللى بتنتشر فيها الستات يعني ..
.
علي اسوأ الاحوال بتكلمه 100 واحدة يوميا ..
يبدأ الاول يغريهم بصور لتحويلات بنكية وفلوس وبنات متصورين مع الفلوس و سكرينات شكر وحاجات كدا .. لحد ما عيونهم تلمع ..

بعدها يبدأ يقولها الشغل في سرية تامة ومحدش هيعرف حاجة وساعتين كل يوم .. وهتلبسي لبس كويس وتعمل فيديو كول وانتى مخبية وشك او لابسة نضارة او جايبة الكاميرا علي جسمك بس ..
.
للاسف بعض البنات والستات بيضعفوا خاصة لو ست مش مرتاحة في عيشتها او بتمر بأزمة مادية كبيرة وايمانياتها واقعة الفترة دى ..
.
بمجرد ما تعمل اول فيديو كول خلاص .. هي كدا بقت جارية عنده .. بيسجلها الفيديو اللى ( بلبس كويس ) ومعالم اوضتها واضحة في الفيديو .. ويهددها انه هيبعته لجوزها و لاخوها وقرايبها ويفضحها ..
.
فتضطر انها تكمل .. وتقدم تنازلات بتزيد كل يوم عن اللى قبله والله اعلم هتنتهي بإيه .. في الاول فرطت في عرضها بمزاجها دلوقتي بتفرط فيه غصب عنها ..
.
الموضوع دا منتشر اوى .. واللى بيلعب عليه بيلعب علي نظرية ( الفرص الضائعة ) .. اللى هو انا هستهدف في الاسبوع 10000 واحدة يوصلهم البوستات بتاعتي .. هتكلمني منهم 1000 .. 5 منهم هيكملوا معايا للاخر .. يبقي انا طلعت في الاسبوع دا بـ 5 (( مماليك )) .. و يبدأ بقي يتاجر في لحمهم بطريقته ..