الفرق بين الكيتو والدايت

كل الناس اللي بتخاف من الكيتو عشان فيه دهون كتير، طول النهار بياكلوا دهون، بس بياكلوها مع نشويات.

اول ما بتيجي سيرة الكيتو، اول حاجة بتيجي في دماغ اي حد هي الدهون وانه دايت كله دهون، بس ده مش صح، الكيتو تعريفه انه دايت منخفض جدا في النشويات، ده ملوش علاقة بالدهون.

بس انا بخاف من الدهون!
انت طول النهار بتاكل دهون.

لو خايف من الزبدة في الكيتو، فانت طول النهار بتاكل زبدة، بس بتدهنها علي التوست او بتاكلها جوا الكورواسون.

لو خايف من الكيتو عشان الجبن فانت طول النهار بتاكل جبن بس متسيحة في رغيف او علي البيتزا.

الstandard diet اللي هو الدايت اللي كل الناس ماشية عليه اصلا مليان دهون، ولو حسبت كم الدهون اللي فيه مش هاتكون اقل خالص من الكيتو لو اتعمل صح.

الفرق بين الكيتو والدايت اللي كل الناس ماشية عليه هو اننا بنمنع السكر والارز والعيش والمكرونة، وبناخد الدهون اللي اصلا كده كده كنا بناخدها مع الارز والعيش والمكرونة بس من غير ارز وعيش ومكرونة