المهم مع الدخول المدرسي هاد الأيام تفكرت واحد القضية كانت أعدا حاجة عندي فالدخول وبالظبط فالإبتدائي ماعرفتش واش باقيين المعلمين كايخدموها ولا هداهم الله.مع الدخلة أول حصة عند شي معلم أو معلمة كايطلب منك تكتب فورقة الإسم الكامل والمهنة ديال باك، علاش بالظبط المهنة واش اللي باه ماخدامش غاتخدموه.

الطامة الكبرى هي ملي كايجمع الوراق ويبقى يدوزهوم بالوحدة ويعيطليك بسميتك الجيلالي! حاااااضر.. وقف باك بزناس صافي جلس.. بحالا كايقول للتلاميد هذا ولد بزناس (هذا غي مثال الواليد ماشي بزناس ) ,

علاش مايعرفش السمية ويقولك وقف ويقرا المهنة بينو بين راسو ويراعي للنفسية ديال التلميذ اللي فسن الطفولة إلى كان باه من الطبقة الكادحة واخا الحمد لله ماعمر نفسيتنا تهزات بسباب والدينا والحالة ديالهم..

ثاني حاجة هي التستيفة ديال البلايص فالمقاعد اللي كانت كاتبنى إنطلاقا من هاد الفعل بحالا كايفرق المقاعد البرلمانية ولد العبد.. حيت كنت ديما كانلاحظ المعلم كايعيط فلان فرتلان وقف آآه.. باك محامي أجي جلس فالمقعد اللول،فلانة بنت فلان آآه.

.باك كوميسير أجي حدا ولد المحامي (نيت يجمع الكوميسارية والمحكمة حدا بعضياتهم) ،فلان بن فلان مممم.. باك بائع متجول يعني عندو كروسة سير للمقعد الأخير، فرتلان ممم باك عساس سير حدا ولد مول الكروسة وزيد وزيد..

حتا كايوليو الطبقة الكادحة كولشي فالأخير والطبقة البرجوازية كلشي فالأمام.. ولكن فآخر السنة العساس تلاقا بمول الكروسة وقاليه مبروك النجاح ديال الدراري والمحامي قال للكوميسير بنتك خرجاتلي على الدري..

علاش هاد الشي كامل وهاد الطبقية حتا فأول نهار فالمدرسة الدري كايتبنا عندو فكر على أن هادوك بوحدهم وحنا بوحدنا كاتولي عارف بلي كاين حنا وكاين هما،

بغيت غي نعرف الهدف ديال هاد الفعل عند الأستاد واش نتا جاي تقري التلميد كيفما كانت حالتو الإجتماعية ولا جاي تقري غي ولاد فلان وفرتلان،.كإشارة فقط ربما هاد القضية مابقاتش أو شي واحد يقولي ولاد الطبقة البرجوازية ماكايقراوش فالعمومي أنا كاندوي على فترة ديال 92 حيت فهاد الفترة ماكانوش المدارس العمومية فالأحياء الشعبية بحال دابا كانو قلال وكاتلقاهم فالاحياء الراقية وماكانوش المدارس الخاصة بكثرة بحال دابا.. وكان ولد الطبقة ديال كغييييم كايقرى مع ولد الطبقة ديال عبقادر..

هاد الشي علاش كانو كايديرو التعازيلة فالمقاعد وكغييييم يجلس حدا نسغيين وعبقادر يجلس حدا الجيلالي..

دابا لا الوقت تبدلات والمدارس ولات بزاف فالاحياء الشعبية ولكن كغيييم ونسرين دارولهم مدارس خاصة بمقررات خاصة ونظام خاص وعبقادر والجيلالي خلاوهم فالعمومي بنظام فاشل ومقررات أفشل..

هادي شحال كانو كايعزلو الطبقات فالقسم دابا ولاو ولاد الشعب كايتعزلو فالزنقة التعليم العمومي للطبقة الكادحة والتعليم الخاص لصحاب الفلوس واخا كاين اللي مسكين مقاتل وعايش على قد الحال وكايتقاتل ويقري ولادو فالتعليم الخاص ولكن نسبة ضئيلة

جدا.والكارثة هي إلى كانت كاتقريك شي معلمة من الطبقة البورجوازية بحال اللي قراتنا فالقسم الثاني ابتدائي سنة 1993 وعزلاتنا كاع بينا المكحطين فالمقاعد الأخيرة وعمرها عيطات لشي واحد بسميتو كانت كاتعيط لينا غي العروبية أجي ألعروبي سير ألعروبي وقف ألعروبي حتا ولاو المدرسة كولشي كايعيطولينا غي العروبية ومانعاودلكمش إخواني على

المدرسة فين كانت وشكون كايقرى فيها.. ولكن الدقة اللي ماتقتل كاتحيي.كنا عروبية بصح جايبين العز ومفتاخرين بوالدينا كيفما بغاو يكونو حيت اللي خلق الكوميسير والمحامي والوزير هو اللي خلق العساس ومول الكروسة واللي خلق مايضيع.. ماتعقدنا ماتوسوسنا ماتخربقات لينا الجينات وخرجناها للتزحلق على الجليد.. كبرنا رجال وأغلى ممتلكاتنا هي كرامتنا وكبرياءنا وغيرتنا على ديننا ..

دابا الحمد لله رجال التعليم معظمهم من الطبقةالمتوسطة وهما عارفين الأثر ديال هاد الاسئلة على التلميذ فسن الطفولة فا كانتمناو مايبقاش هاد السلوك..

الوالدين مسيفطين ولدهم يقرا قريه وانتهى ماسوقكش باه خدام ولا ماخدامش حيت نتا كاتخلص من الدولة ماشي من عند باه.. دوزو بخير