العقار المخصص لعلاج ضمور العضلات الشوكي اسمه زولغينزما العلاج قيمته حوالي 34 مليون جنيه مصري

🔴 العقار المخصص لعلاج ضمور العضلات الشوكي اسمه زولغينزما العلاج قيمته حوالي 34 مليون جنيه مصري أو 2 مليون دولار تقريباً!، وده رقم يفوق إمكانيات 99% من سكان العالم أصلاً.. العظيم إن الشركة المنتجة للعقار بتختار كل سنة 100 طفل من كل العالم عشان تديهم جرعة العلاج ببلاش!.. اختيار الأطفال بيتم بشكل عشوائي عن طريق لوتري دولي بيتم تحت إشراف الشركة نفسها.. فيه شروط لإختيار الـ 100 طفل من ضمنهم إن عمره مايزدش عن سنتين وإن تكون إصابته مصنفة في الجين الأول.. وحدة أمراض العضلات والأعصاب في طب عين شمس رشحت للشركة 8 حالات من الأطفال المصابين.. الشركة اختارت في شهر مارس اللي فات الطفل “ريان” عشان ياخد حقنة العلاج وكتبنا عنه هنا على الصفحة..

رغم إنها حقنة واحدة بس لكن اختيار “ريان” كان مجرد الخطوة الأولى لمجموعة خطوات مهمة.. منها مثلاً إن مجرد نقل الدواء محتاج درجة حرارة سالب 80 درجة مئوية.. وتم نقله على خير الحمدلله.. تاني حاجة الفريق الطبي كان محتاج يتدرب على طريقة الحقن لإنها عملية مش معتادة عندنا هنا في مصر.. والحمدلله ده برضه حصل فعلاً برضه من خلال فرع الشركة المنتجة للدواء في مصر اللي سهلت تدريب الفريق الطبي، وبسبب مهارة وتميز نخبة من أطباء مصر المتخصصين تم الحقن بنجاح ملفت.. نجاح خلّى الشركة المنتجة للعقار تاخد قرار تاني مهم!.. قرروا يختاروا طفل تاني مصري من ضمن قائمة الـ 8 أطفال اللي رشحتهم جامعة عين شمس!.. وكان الطفل “آسر” اللي عليه الدور..

النهاردة في مستشفى عين شمس التخصصي الطفل “آسر كريم الدين” اللي عمره سنة و10 شهور والمريض بضمور العضلات الشوكي تم بنجاح حقنه بدواء ” زولغينزما” عشان يبقى ثاني طفل مصري يتم علاجه بالدواء!.. والسبب بعد ربنا؟.. أطباء مصر اللي أثبتوا كفاءة مبهرة في المرة الأولى مع “ريان” واللي ثقة الشركة الأجنبية فيهم أجبرتهم يكرروا التعاون معاهم تاني في حالة “آسر”!..

حياة طفلين اتغيرت بنسبة 180 درجة الحمدلله، ولسه حياة أطفال مصريين كتير تانيين هتتغير قريب جداً بعد قرار الرئيس “عبد الفتاح السيسي” بعلاج مرضى ضمور العضلات الشوكي على نفقة الدولة واللي بدأت خطوات تنفيذه على الأرض فعلاً زى ما كتبنا امبارح بعد تخصيص 24 عيادة على مستوى الجمهورية لاستقبال الأطفال مصابي الضمور العضلي.. مصر الحديثة عظيمة بقيادتها وأطباءها، والثقة فيهم بتثبت دايماً إنها في محلها وبدون حدود.