واحنا هنمشي ورا التنوير والمستنورين
ولا ورا الفقه والفقهاء ؟؟!
الفقه الاسلامي ده فهم صحيح مبني على أسس وقواعد
الفقه مبني على يعني إيه محكم ومتشابه
ويعني ايه ناسخ ومنسوخ
ويعني ايه مطلق ومقيد
ويعني ايه مجمل ومفصل !
ويعني إيه قطعي ويعني إيه ظني ؟!
ويعني ايه مواطن إجماع ومواطن خلاف
ويعني إيه حقيقة ومجاز ويعني ايه لغة
ويعني إيه صحيح وضعيف وموضوع
وضعيف يُعمل بيه وصحيح لا يُعمل بيه ؟!
ويعني إيه تشريع عام وآخر خاص !
ويعني إيه ثوابت ويعني إيه متغيرات
ويعني إيه أسباب نزول
والأمة كلها ماشية على الفقه من قديم الزمن
يعني ماشية بالأصول وتعرف الأصول اللي هي التنوير الحقيقي
انما التنوير بتاع النهاردة ده شغل طظ فش اللي لايعرف الأصول ولا هوب من الأصول
التنوير شغل إني اعترض
أعترض وخلاص المهم انا مش موافق
التنويري بيمسك نصوص بظواهرها و بينكر ويرد جزافا بدون علم فقط لأنه مش عارف او مش فاهم وده لأنه مالقيش اللي يوجهه وفي نفس الوقت مستكبر يفهم وعامل نفسه عالم
التنوير المزعوم ده مالوش أي اساس علمي ولذلك بيهربوا من الفقه اليه فيتجنبوا الفقه واليات الفهم الصحيح ويشتموا فيه وفي الفقهاء لأن الفقه بيعري جهلهم
ويلتزموا التنوير ويقولك انا تنويري ومستنير !!
ولو نظرنا في التنوير ده لا نجد له اي معالم ولا أسس ولا حتي تعريف ولا مباديء
هو مجرد مصطلح لقيط وستارة للجهل وقراءة سطحية للنصوص تؤدي الى تعامل ساذج معها بحيث يكون الأخذ والرد قائم على الانتقائية ثم يتطور الأمر الى التشكيك والطعن ! أهو طعن وخلاص المهم نطعن ونبقى مفكرين !
التنوير باختصار هو امتهان ثقافة الرفض والتكذيب والتفكير المادي في أبهى صورهما
هو ثقافة التشكيك والطعن بالهوى والانتقاء والأخذ والرد القائم على الانتقائية اللي ممكن أي مدعي وأي حد.يمارسها
والرفض ليس عِلما او مزية خاصة فالناس أعداء ماجهلوا !!
ولا رتبة في حد ذاته كي ينال من يمارسها لقب مفكر وباحث وإنما حالة من الجهل ومكابرة غير المتخصص مع المتخصص في تخصصه
(بل كذبوا بما لم يحيطوا بعلمه ولما يأتهم تأويله)!
هو في الحقيقة حالة من التمرد على العقل الجمعي وتزييف مستقراته الدينية والتاريخية وزعزعة ثوابته العقلية والنقلية
التنوير تخريب وهدم وسفسطة تهدم نظام البشر وتضيع بها كافة الحقائق
التنوير نمط تفكير بدون اسس او قواعد امتهنه دعاة المادية
التنوير حالة من العبث والفوضى الفكرية
الفرق بين الفقه والتنوير
زي الفرق بين الدهب الحقيقي والدهب القشرة
هو نفسه الفرق بين نبات الارض ونباتات الزينة البلاستيك !
هو نفسه الفرق بين الحق والباطل
الفقه والتنوير كلاهما تفكير ومخرجات
لكن الفقه مخرجات بضوابط وشروط
اما التنوير فمخرجات الهوى والتشهي والمادية والمكابرة
نعم للفقه لا للتنوير
التعليقات مغلقة.