.
من 20 سنة تقريبا كنت بدخل علي الانترنت من سايبر في شبرا والساعة كانت بـ 24 جنيه ( مبلغ ضخم جدا وقتها .. تدكرة السينما كانت ب 2 جنيه ) .. وكانت السرعة ضايعة ..
بعدها بشوية المصرية للاتصالات عملت خدمة الانترنت المجاني فدخلت من البيت .. كانت الخدمة موجودة قبلها لكن عدد قليل من السنترالات كان بيدعمها .. كان الحساب فيه بالساعة وبتنضاف علي فاتورة التليفون .. وعلشان تتصل بالانترنت كنت بتوصل كيبل التليفون بـ ( مودم ) متركب في ( الكيسة ) .. وتتصل برقم غالبا كان بيبدأ ب 0777 .. وتسمع مزيكا كدا علي ( الصب ) تحسها من الفضاء الكوني .. وانت وحظك بقي الاتصال ينجح ولا لأ ..
.
السرعة كانت 56 لـ 64 كيلو بت في الثانية .. ودا كان تحول رهيب ..
بعدها بكام سنة دخل الـ ADSL مصر .. و السرعات رحات في حتة تانية خالص .. بقت عندنا سرعات بتوصل لـ 128 كيلو بت .. و 256 كيلو بت .. والناس مبقتش مصدقة نفسها ..
.
بعدها بفترة جت سرعة 512 كيلو بت في الثانية .. شوية شوية اترفعت السرعات كلها واتلغت سرعة 256 ..
.
جت بعد كدا الشركات واعملت سياسة الاستخدام العادل و حددت الداونلود لكل باقة . ومن كام سنة ظهر VDSL للوصول لسرعات عالية جدا لكن مش كل السنترالات والمناطق ينفع تشتغل فيها .. عندي مثلا البنية التحتية متشغلش اكتر من 90 ميجا ..
.
حاليا .. السرعة عندي في البيت 70 ميجا بت في الثانية :-
- اسرع 2000 مرة من اول استخدام ليا.
- اسرع 1120 مرة من اول استخدام للانترنت المنزلي ليا.
- اسرع 560 مرة من اول استخدام للانترنت فائق السرعة ADSL.
- اسرع 70 مرة من استخدامي للانترنت في 2011.
.
.
دي ملخص حدوتة تطور ( مرفق ) الانترنت في مصر ..
جيل التمانينات واللي قبلهم هيقدروا ( يسمعوا ) الصورة دي ..
زيرو تلت سبعااااااااات خمستلاااااااااااف
يا حلاوة
زيرو تلت سبعااااااااات خمستلاااااااااااف
يا حالولي
زيرو تلت سبعااااااااات خمستلاااااااااااف
اديلو
التعليقات مغلقة.