إيه حكاية سد النهضة ده وليه أثيوبيا مصرة عليه بالشكل ده وإيه موضوع الملأ الثاني للسد وهل نجحوا فيه فعلا وإيه خطورته على مصر وهل الحل العسكري ما زال ممكن ولا الموضوع انتهى؟

في البداية كلنا عارفين نهر النيل أشهر وأطول نهر في العالم اللي بيمر على 10 دول أفريقيا اسمهم دول حوض النيل.

منبع ومصدر النهر هو بحيرتين واحدة اسمها
(بحيرة فكتوريا في اوغندا) و التانية اسمها (بحيرة تانا في اثيوبيا) وأمطار أثيوبيا.

أيام فترة الاحتلال البريطاني لمصر مصر عملت اتفاقية إلزامية للدول دي محدش يعمل سد ولا مشروع مائي غير لما يرجع لمصر.

اشمعنا مصر؟ عشان مصر دولة المصب؟ يعني إيه مصب؟ يعني هي الدولة اللي بيوصل مجرى النيل عندها لاخره وبيفضي ميته في البحر الأبيض المتوسط من فرعين دمياط ورشيد فأي حاجة هتتعمل على النيل هتأثر على مصر بشكل مباشر فلازم موافقتها عشان تحفظ حقها وتمنع أي ضرر محتمل عليها.

الاتفاقية دي كانت في سنة 1929 وبعدها عملت اتفاقية تاني خلت نصيبها من نهر النيل 55 مليار متر مكعب في السنة وده رقم ضخم وقتها.. يعني بالعربي مصر كانت ليها السيادة والكلمة العليا على نهر النيل.

الدول الأفريقية المشتركة معانا في النهر ده دول فقيرة جداً بتبص لمصر كدولة غنية متقدمة بسنين ضوئية وجه كمان مشروع السد العالي اللي نقل مصر نقلة تانية ودخل الكهربا لاغلب البيوت المصرية فالحقد ذاد خاصة ان الدول دي متعرفش حاجة عن الكهربا والتطور وقتها وباصين لمصر ان الخير اللي هي فيه ده من نيلنا اللي منبعه ومصدره من عندنا ولغة الخطاب تجاه مصر رسخت الحقد ده والنظرة دي كنظرة دولة ارضها محتلة لدولة استعمارية.

في فترة الخمسينات كانت دولة من بلاد حوض النيل ومصدر أكبر نسبة من نهر النيل كمنبع اسمها (اثيوبيا) بتخطط لمشروع ضخم جدًا عايزة تغير بيه تاريخ نهر النيل كليا ويخلي السيطرة ليها وحدها.

المشروع كان برعاية امريكية وحدد موقع لبناء سد شاهق داخل أثيوبيا، وكان التخطيط بين سنة 1956 و 1964.

واللي ملاحظ التواريخ دي هتعرف ان المواضيع مش صدفة.

ده الوقت اللي رفضت فيه تمويل السد العالي لمصر عن طريق البنك الدولي وحطت شروط تعجيزية فكان رد مصر هو تأميم قناة السويس اللي هيج الغرب علينا وحصل بعده العدوان الثلاثي على مصر.

أمريكا حبت تنتقم بطرقها الخبيثة فجريت على أثيوبيا الهفأ وقالتلها هعملك سد وهخليكي احسن من مصر وو

وهتلاحظوا دايما ان أثيوبيا دي مجرد واجهة مش اكتر.

طب ليه أثيوبيا معملتش السد وقتها؟

من حظها الأسود انقلاب حصل في اثيوبيا وقف المشروع لمدة طويلة خاصة بعد ما أمريكا انشغلت في اغتيال كيندي وحرب فيتنام والحرب الباردة مع الاتحاد السوفييتي وغيرها.

لحد ما جات سنة 2009 وبدأت اثيوبيا تعمل مسح جديد على الموقع الجديد

وفي 2011 أعلنت اثيوبيا رسميًا وضع حجر الأساس لمشروعها الجديد سمته سد لنهضة العظيم!

طب اشمعنا التوقيت ده بالذات ومين الممول والداعم ؟

استغلت أديس أبابا انشغال القاهرة بعملية الانتقال السياسي في أعقاب الإطاحة بالرئيس المخلوع حسني مبارك في ثورة يناير ، وتفرُّغ الجيش للحكم من خلال المجلس العسكري وعودة الأمن للداخل وحطت حجر الأساس للسد الأضخم في أفريقيا على النيل الأزرق.

وعن مصادر التمويل فكنت كتبت مقال قبل كدة مفصل هسيبلكم اللينك بتاعه في أول تعليق فيه إثباتات تاريخية ومعلومات وأخبار موثقة ان اللي ورا الليلة دي كلها الكيان الصhيوني واثيوبيا ما هي إلا مجرد واجهة وهفأ زي ما قلنا عشان كدة مقوية قلبها.

ده غير شوية تمويل داخلي من بنوكها وغيرها.. نسخت تجربة مصر في تمويل السد العالي كوبي بيست

برضو ده كله مجابش نص مليار دولار وهي عايزة 5 مليار فتدخلت الصين واستثمرت فلوس هناك وتعهدت بتمويل السد.. شغل مصالح كبير.

بالاضافة لشوية شركات فرنسية وإيطالية وأمريكية.

نرجع لاثيوبيا وسدها.. طب مش هتاخدي موافقة مصر الأول حسب الاتفاقيات اللي بينكم ؟

اثيوبيا قالت إن الإتفاقيات دي كانت لحماية حصة مصر في نهر النيل وكانت بدون تدخلها.

والسد هيكون بتكلفة 5مليار دولار تقريبًا! رقم ضخم عارفين مين مموله.

الرقم ده حوالي 6% من الناتج المحلي الإجمالي لإثيوبيا سنة 2018)، وهو مبلغ يتعذّر جمعه بطرق التمويل التقليدية، خاصة في بلد صُنِّف كأحد أكبر المتلقّين للمساعدات الدولية في أفريقيا اول عشر سنين في الألفية الجديدة.

وهيكون أكبر منتج طاقة كهربائية في افريقيا،
وهيحول اثيوبيا من دولة بيعيش أكتر من نص سكانها بدون كهرباء لدولة هتبيع الكهربا!

طب ما دي حاجة حلوة اهو ياعم ما نسيب الناس تطور من نفسها إيه المشكلة؟

صحيح السد ده فيه فوايد لأثيوبيا، ولكن السد ده ممكن يكون نهاية نهر النيل التاريخي في مصر وكمان السودان!

لأنك عشان تستخدم السدّ لازم تملاه بـ74مليار متر مكعب من المية وأصلا وتدفق نهر النيل في مصر والسودان هو 66مليار متر مكعب بس!

وده معناه ان حصة مصر السنوية من المية هتقل جداً حداً.

المشكلة الأكبر في مصر اكتر من السودان

لان السودان عندها أنهار ثانية، لكن مصر دولة بتعتمد بنسبة 95% على نهر النيل في احتياجاتها المائية، فمياه الشرب والزراعة في مصر كلها بتعتمد على نهر النيل وكل المحافظات المصرية تقريباً بتمر على نهر النيل، وجفافه يعني تهديد وجودي لأنها أصلا بتُعاني من ندرة مائية.

لأن الحصة ثابتة وعدد السكان تضاعف بشدة زي ما شرحنا بالتفصيل في مقال سابق.

المهم من 2011 ومصر بتقاوح معاهم متبنوش لا هنبني طب ابنوه بس متضرنوش بالله عليكم.. ماشي.

لحد ما جات سنة 2019 وبقينا قدام امر واقع أولى لما أنهت أثيوبيا بناء السدّ وملته ملء أولي بكمية تبلغ أكثر من 4 مليار متر مكعب.

والأرقام كانت بتشير إلى انه نقص 5 مليار متر مكعب من النيل ممكن يأثر على مليون فدان زراعي، وبيأثر في 20 مليون من السكان العاملين في الزراعة.

الملأ الكامل للسد كان على مراحل عشان توصل للكمية الضخمة دي اللي هي 74 مليار متر مكعب.

بعد الملأ الأول كانت فكرة نسف السد عسكريا مقبولة وهي الحل الأقرب للطرح قبل انتهاء الملأ الثاني للسد.

وهو ده الوقت الوحيد المناسب لأنه في حال تم تفجير السدّ بعد اكتماله فده معناه أنه هتندفع موجة ضخمة من المياه هتدمر معظم مناطق السودان وبعد أيام هتلحق بمصر المياه وهتنتج كارثة بيئية وانسانية.

لكن مصر سلكت طريق المفاوضات.

مصر إدت اثيوبيا إقتراح إنها تملئ السدّ كامل على 10سنوات ولكن في الأوقات اللي يكون فيها فيضانات.

أثيوبيا رفضت ومُصرة إنها تخلص ملء السد بالكامل كأقصى حدّ في 2022!!

المهم فضلت الأحوال هادية تقريبًا بعد هذا الخطاب لحد ما اتصدمت مصر في يوم 6 يوليو اللي فات بأثيوبيا بتخطرها رسميًا ببداية الملئ الثاني لـ سد النهضة!

الملء الثاني هيكون بكمية 14مليار متر مكعب، و فيه 4 مليار جوا السد من الأول يعني الحصيلة هتكون 18مليار متر مكعب!

مصر والسودان جريوا على مجلس الأمن يشوفلهم حل ودي تصريحات الحكومة المصرية والسودانية في مجلس الأمن:

-سد النهضة يؤثر على نصف سكان السودان وكامل سكان مصر.

-150 مليون مصري وسوداني تحت الخطر بسبب سد النهضة.

-ما زلنا نمارس ضبط النفس تجاه إثيوبيا واذا أصرت على الرفض التفاوضي ليس أمامنا سوى الدفاع عن حق الشعب المصري بالبقاء.

ودي تصريحات اثيوبيا في مجلس الأمن:

-مشروع سد النهضة يسعى لتحقيق أحلام شعبنا.

-انها المرة الاولى التي يناقش فيها مجلس الامن مشروع تنموي.

-يمكننا الوصول لاتفاق من خلال التفاوض بحسن نيه.

-لا نستجيب للضغوط ونمارس ضبط النفس بأزمة سد النهضة.

المهم مجلس الأمن قالك انا مليش دعوة وروحوا حلوا مشاكلكم دي مع الإتحاد الأفريقي بتاعكم.

أغلب الدول الأعضاء في مجلس الأمن شركاتها مشاركة في بناء السد فمش من مصلحتها ترفضه.

بعدها بكام يوم أثيوبيا أعلنت نجاحها رسمياً في الملأ الثاني للسد!

عضو الوفد الإثيوبي لمفاوضات سد النهضة، يلما سيليشي، صرح في مقابلة مع وكالة الأنباء الإثيوبية، أن سد النهضة أوشك على الانتهاء وأن أكثر من 80٪ من إجمالي البناء تم انجازه.

ودعا شعبي السودان ومصر للقبول بحقيقة أن «الملء الثاني للسد نجح ومع ذلك متتسبش في أي ضرر كبير لدولكم ده كمان بل إنه هيعود بكثير من الفوائد على دول المصب خاصة والمنطقة كلها.

رئيس الحكومة السوداني عبد الله حمدوك، صرح وعلق وقال أنه

«رغم إعلان الحكومة الإثيوبية اكتمال عملية الملء الثاني ومواصلة للتصرف في هذا الملف بشكل أحادي وللمرة الثانية، إلا أن حكومته ستواصل الدعوة للامتناع عن الإجراءات المنفردة مع ضرورة التوصل لاتفاق قانوني وملزم يتماشى مع القانون الدولي».

اما عن مصر فرفضت تعترف بنجاح الملء الثاني ده بل وصفته بالفشل الذريع.

وقالت أنه اللي اتحُجز خلال الملء الثاني اللي بيقولوا نجح ميزيدش عن 3.5 مليار متر مكعب من المياه إضافة للمياة القديمة يعني حوالي 8 أو 8.25 مليار متر مكعب وده بيتعارض مع الرقم اللي قاله وزير الري الإثيوبي وهو تخزين 13.5 مليار متر مكعب في الملء الثاني، وان ده رقم غيرمنطقي على الإطلاق حسب صور المياه المخزنة اللي نشرها الوزير على حسابه.

والخبر منتشر على أغلب الصحف والمواقع المصرية.

وأنا أميل للرأي ده لأني لقيت فيه منطق علمي هندسي من متخصصين.

الأيام اللي جاية فيها إيه الله أعلم.

لكن الواضح ان الناس دي مينفعش معاهم تفاوض.

وأنهم متطمنين لحتة الاتفاقية الأمنية مع الكيان الصهيوني وفرحانين بيها.

ده الموضوع كله ورغم أني طولت كتير لكن اختصرت كتير جدا.

أتمنى يكون الموضوع عجبكم.

سد_النهضة