غش الاكل في القاهرة ..
.
نبدأ باللحمة .. كتير من الجزارين بيبيعوا لحوم مجمدة على انها بلدي .. لحوم سوداني على انها بلدي .. مع انها جودتها عالية بس فرق السعر بيخليه يغش .. غير السقط ..
وان كان السقط منتشر في الاقاليم اكتر .. اشهر بلد للحواوشي في مصر مثلا. كتير من جزاريها بيشتغلوا في السقط ..
.
الكبدة .. معظم الكبدة اللي عند الجزارين مستوردة وبتتباع على انها بلدي .. ايام العزوبية لما كنت ساكن في مدينة نصر كانت زوجة البواب هي اللي بتجيبلي الخضار واللحمة وكدا وساعات كتير بتطبخ وتطلعلي الاكل .. فكانت بتاكل حتة من الكبدة نية علشان تفرق بين البلدي والمستوردة!!
.
اللحمة المفرومة .. كدا كدا بنقول لو متأكد مليون في المية انها بلدي متشتريش مفروم من برا .. افرم في البيت .. او تتفرم اللحمة ادامك وتاخدها على التجميد او الشغل على طول .. لان مساحة سطح اللحمة بعد فرمها بيتضاعف وبيتضاعف معاه معدل نمو البكتريا عليه .. اما اللحمة المفرومة الجاهزة ففيها ما لذ وطاب من اى نيلة متعرفش هي ايه ..
.
اللبن ومنتجاته والعسل والطحينة وباقي الشلة .. الغش فيهم مغرق مصر .. انا شخصيا بفضل اللبن المبستر زى المراعي وشلته .. العسل بنصح بتثبيت مورد تأكد من ثقته .. و الطحينة بجيبها من حد بيعصر السمسم ادام عيني .. ودا موجود في الماركتس الكبيرة حاليا.
.
السمنة البلدي الفلاحي بتنضرب بسمنة نباتي .. وشيفات التليفزيون هم اللي ابتدعوا الحوار دا .. سواء بيستخدموا سمنة نباتي بالكامل او بيخلطوها ..
والجبن زى الموتزريلا والشيدر بيتغشوا غش السنين وتيجي تستخدمهم تلاقيهم لا بيمطوا ولا بيدوك طعم ..
.
ندخل على السمك .
السمك بيتغش حدانا في اسكندرية .. فتخيل بقى اللي بيحصل في القاهرة والاقاليم غير الساحلية ..
بداية من فيليه الباسا المستورد .. السمكة اللي بتعيش في مصارف تايلاند .. وانتهاءا بالشيكال (صرصار البحر) اللي لحد النهاردة فيه ناس بيصدقوا انه جمبري .. مرورا بالطوبار اللي بيتباع كبوري حر .. جمبري المزارع اللي بيتباع على انه جمبري ازاز متفهمش ازاي.. دا غير سمك السيلفر (الكيلو بخمسة جنيه) اللي بيتباع على انه قاروص ( الكيلو ب ٢٠٠) ..
كل دا نعديه .. لكن اللي مينفعش يعدي الفجـ.ـرة اللي بيعملوا فيليه من سمك القراض ويبيعوه على انه فيليه قشر بياض ولا قاروص .. ومهما كان السماك شاطر ممكن اللحم يبقى مسمم او السم ينتقل من الكبد والاحشاء للحم .. وقبل كدا ماتت عيلة كاملة في اسكندرية بسبب اكلة فيليه سمك اشتروها وميعرفوش انها فيليه قراض.
.
التمر هندي ..
ملوش علاقة بالتمر هندي .. دا مجرد ملح ليمون وصبغة وسكر .. واهري الكبد والكلى يا معلم ..
.
الكوارع ..
في القاهرة مفيش اوي ثقافة اكل ( الحلالي ) بعكس اسكندرية .. فهناك بيشتروه رخيص ويرموه مع الكوارع في الشوربة والطاجن والزبون مبيعرفش الفرق .. ومحدش يسأل ايه هو الحلالي علشان عيب ..
.
مطاعم المقليات .. اللحوم والبطاطس تحديدا ..
بيستخدموا زيوت قلية غير اللي بنستخدمها في البيوت .. علشان تتحمل ضعف درجات الحرارة فالاكل يستوى بسرعة علشان ينجزوا وكمان يوفروا في الغاز والكهرباء ..
علشان كدا تاكل احلى بطاطس واحلى فراخ سخنة .. لو سبتهم يبردوا وجيت تاكلهم تلاقي طعمهم وحش .. حاولت تسخنهم تاني تلاقيه اوحش ..
.
مطاعم وعربيات الكبدة ..
هتستغرب لما اقولك انها من انضف الاكلات اللي ممكن تاكلها .. لان رغيف الفينو اللي عنده انيميا تكلفته نص جنيه .. بيشيل ٢٥-٣٠ جرام كبدة بالحباش تمنها حوالي جنيه.. حط عمالة ومرافق وايجار و شاي بالياسمين ومخلل .. الرغيف اخره اوي اوي ٢ جنيه .. ٢ ونص ..
كلامي عن الكبدة بس .. السجق اساسا اساسا مفيهوش لحمة .. ومش لازم نقول فيه ايه ..
.
الفول
بيضيفوا له مادة اسمها ايديتا بكميات اكتر من المسموح بيها علشان يستوى بسرعة .. غير ان نص فول القاهرة بيتسوى في محارق زبـ!لة .. وبالمناسبة .. دى ارحم بكتير من الاديتا ..
.
.
.
الخلاصة .. القاهرة عاصمة الغش في السلع الغذائية وبعدها الاقاليم بتتفاوت ..
.
ومن ابو اخر كدا الكلام دا لمجرد العلم بالشئ .. لكن احنا كرجالة مبنعتمدش غير الطعم ..
يعني ايه مثلا ابقى في وسط البلد و مضربش عشرين ساندويتش كبدة وسدق من الكحلاوي .. ولا في العباسية ومضربش طلب سمين من عند سامية انتينال ؟!
التعليقات مغلقة.