للأسف في رمضان اسوأ مواضيع تعرض وتناقش في أطهر أيام !!!!! مسلسلات رمضان….

271

مصيبة كبرى لما عمل درامي بيتكتب لإرضاء الفيمن$يست ومحاولة كسب ودهم بالباطل والأفكار المسومة!

مسلسل لعبة نيوتن هيتسبب في خناقة كبيرة أوي الفترة الجاية لأنه أكبر واوضح مثال شوفته لدس الأفكار المسمومة في عقول المتلقي وهشرحلكم بالتفصيل ليه وهتعرفوا إني مش مبالغ.

مبدئيا قبل ما نناقش مسلسل لعبة نيوتن خلينا نعرف إن أغلب أعمال رمضان السنة دي فيها ترويج لفكرة الخيانة الزوجية والزنا والعر$بدة وهديكم أمثلة عشان تعرفوا إن كلامي مش من فراغ.

مسلسل ملوك الجدعنة فيه مثال لأم من منطقة شعبية بتزني مع عيل من دور ولادها وبنتها ماشية على خطاها والاتنين بيبرروا لبعض أفعالهم خاصة الأم أنها حرة وبتاع.

مسلسل اللي مالوش كبير البطلة بتتفق مع بلطجي يق$تل زوجها وبتهرب معاه وبتقع في علاقة حب معاه ولأن الزوجة هنا هي الجميلة ياسمين عبد العزيز والزوج هو العجوز البدين خالد الصاوي والبلطجي هو صاحب الشارب مفتول العضلات أحمد العوضي فبدل ما الانطباع العام يكون استنكار واحت$قار الفكرة لا ده بقى هييح وتشجيع ويارب العلاقة تكمل للنهاية.

مسلسل نجيب زاهي شركس بتاع يحيى الفخراني.

عجوز عاش عمره كله زنا وسكر ومقضيها طول وعرض وفتيات ليل لدرجة انه واحدة منهم عاشت في بيته 25 سنة بدون زواج وخلفت منه ولد في الحرام ميعرفش عنه حاجة.

وقيس على ده مسلسلات كتير لكن لعبة نيوتن اصيعهم واخطرهم لأن النماذج اللي فاتت واضحة وبارزة لكن هنا بيحصل تلاعب على عواطف المتلقي ويخليك تتعاطف مع المخطئ وتكره صاحب الحق.

وهلخصلك ده في نقاط واضحة.

1- زوجة بتسافر لوحدها بدون زوجها أمريكا بحجة عايزة تولد هناك والابن ياخد الجنسية ولأنه فشل يسافر معاها ويطلب منها ترجع بترفض تسمع كلامه وهنا بيتم تصوير زوجها بمبدأ الشرير برضو ومع ذلك بيسامحها وييجي على نفسه.

2- الزوجة المصرية المسلمة بتقعد وتبات في أوضة مع شاب غريب هو وحبيبته وبتكذب على زوجها وتقوله قاعدة مع واحدة بس.

3 – الزوج محمد ممدوح لما يعرف أنها بتبات مع شاب وبتكذب عليه بيتصل يتخانق معاها يكون رد فعلها إيه ؟ تزعق فيه وتطلعه هو الغلطان أنه مش واثق فيها وتقفل تليفونها عشان ميعرفش يوصلها.

4- زوجها بيتصل بيها يقولها ارجعي ويتحايل عليها عشان محتاجها هي تنطش كل ده عشان تكمل خطتها.

وعشان المشاهد يتقبل سلوك الزوجة الغلط ويتعاطف معاها مقدمين نموذج الزوج شخصية متسلطة لاغي شخصيتها وبتاع ومش بيهتم بيها واللي هو ده كافي ومبرر لتصرفاتها واللي لسة هيحصل بعد كدة كمان.

إيه تاني هيحصل وعايز يبرره المسلسل ؟

محمد فراج او المحامي اللي عايش في أمريكا مؤنس شخصية بتظهر للبطلة لراجل عكس زوجها تماما طيب وحنين بيحتويها ويهتم بيها ويتفهمها كويس وتبدأ واحدة واحدة تظهر المقارنات بينه وبين زوجها وتبدأ تتعلق بيه وتظهر مشاعر متبادلة بينهم وبيعترفلها بحبه والمشاهد عيونه تطلع قلوب وبيقول يارب تكمل على خير وتخ$ون زوجها!!

في نفس الوقت زوجها بيفيض بيه وبيطلقها فالشتايم تنهال عليه والتعاطف كله مع الزوجة اللي في نظر الناس مغلطتش والمخرج عشان يكسب التعاطف ده ويخليه يطلع من المشاهد لا إرادي بيقدمهولك بطريقة خبيثة جداً..أزاي ؟

أولا الزوج زي ما قلنا زوج متسلط وخشن ووو

ثانيا مشهد الطلاق المؤلف والمخرج خلوه أمتي ؟ وهي بتولد وكانت رايحة تفتح الفون عشان تكلمه يا عيني تشاركه اللحظة دي عشان تتفاجيء بيه القاسي قليل الأصل باعتله رسالة بيطلقها فيها والزوجة تعيط وشحتفة تخليك تسب لزوجها الواطي

وده دس السم في العسل بس اللي فات حمادة واللي جاي حمادة.

قلت في البداية ان المسلسل من وجهة نظري مكتوب لإرضاء الفيمن$يست ولاغراض أخرى فصعب عليهم يقدموا نموذج الراجل الشهم اللي ظهر في حياتها بالملاك الطاهر النس$ويات يقولوا علينا إيه ؟ فيه رجالة كويسة كدة ؟

أولا الراجل جايبينه متجوز

لا ومتجوز واحدة زي القمر ومتكاملة ومفيهاش غلطة ومش مقصرة مع زوجها في حاجة.

وعشان يكملوا الصورة مطلعين الراجل ده ملتحي وسمته سمت راجل ملتزم دينيا.

كمان في مشاهد برومو المسلسل مشهد بيوحي أنه هيحصل خيانة جس$دية بين البطلة منى ذكي والزوج الملتحي ده في الحلقات اللي جاية

وهنا هيحطوا المشاهد في حالة خلل في مبادئه.

هيتعاطف مع الزوجة لأنها شخصية طيبة وبنت ناس رغم أنها خاينة وكذابة.

هجوم على الراجل محمد فراج اللي خانت زوجها معاه لأنه متجوز وظلم ست تانية مقصرتش في حقه وكمان ملتحي يعني بيؤكد على الصورة اللي بيصدرهالنا الإعلام عن عمد ان كل ملتحي لاما إرهابي لاما خائن وبتاع نسوان.

مع أن الاتنين خاينين ووس$خين لكن هيحصل تلاعب بالمشاعر ودس السم في العسل حرفياً وتبرير ودي$اثة وخناقات وفتنة وكل طرف هيحاول ينتصر لرأيه وتشويه لمبادئ المفترض تكون واضحة وضوح الشمس.

الصح صح حتى لو اللي بيعمله شخص فيه صفات سيئة تانية.

والغلط والوساخة وساخة حتى لو اللي بيعمله منى ذكي او ياسمين عبد العزيز.

المسلسل ده بالذات ملاحظ من أول رمضان أنه بيحصل له توجيه متعمد مدفوع الأجر لمشاهدة العمل على صفحات وجروبات كثيرة ساعدها في ده أن العمل نفسه متقن بالمناسبة من حيث الإخراج والنص والتمثيل ومبتعد عن سكة الافورة وركاكة الحوار اللي وقع في فخها أغلب مسلسلات السنة دي.

حاجة زي دي نجحت في جذب قطاع كبير من الجمهور متذوق لأنه يتقدمله منتج جيد لكن بيتبثله فيها أفكار مسمومة زي دي.

طب ياعم دي شوية مسلسلات تافهة وملهاش تأثير.

لو أنت مش مدرك قيمة وتأثير المسلسل في تشكيل وعي الشعوب وتعديل مبادئها وافكارها بسهولة وبخبث تبقى راجل طيب جداً ومش مدرك ان سبب الفساد الأخلاقي اللي وصله المجتمع سببه بنسبة كبيرة جداً الأفلام والمسلسلات اللي من النوعية دي اللي نجحت في تشويه افكار واخلاق الناس.

حاول متبقاش وعاء يحطوا فيه اللي هما عايزين يحطوه.

ولا تخلي أهلك وعاء وخليك أنتي الدرع الي تحميهم وان المنع مش دايما هو الحل الانجح والتوعية بالمنطق والعقل أفضل وارسخ.

وربنا يستر من اللي جاي.

بصوا في الصور والكلام اللي تحتها هتلاقوا توضيح اكثر لمحتوي البوست

كان قدامهم ۱۱ شهر في السنة يعملوا فيها مقالب وفوازير ومسلسلات وإعلانات وأفلام وسهرات لكن سابوا ۳۳۰ يوم واتنافسوا بكل قوتهم عشان يعملوا كل الملاهي دي في شهر العبادة اللي ربنا قال عنه “أيام معدودات” ؟!

وكأن أعوان إبليس وخدمه ساءهم أن يُسلسل زعيمهم فقاموا في الناس مقامه واجتهدوا لتعويض غيابه !

-أحمد خالد توفيق

رحمه الله عليه