طريقه فى عمل لحمة الرأس والفشة واللسان

992

هتشترى لحمة رأس ولسان وفشة هتغسلى الفشة حلو وتحطيها فى حلة الضغط(الحلة السب ) وعليها مية تغطيها وشوية ملح وكمون وتقفليها كويس ولما الصفارة تلف هتوطى عليها النار وتسيبيها حوالى ساعة إلا ربع وبعد ماتطفى النار و تبرد تفتحى عليها وترمى مية السلق وتحطى الفشة فى مصفى هتغسلى لحمة الرأس واللسان ومعاه جزء الحلويات (جزء من لحمة الرأس فيه السمين) وتحطيهم كلهم فى حلة الضغط وعليهم مية تغطيها وتحطى ملح وفلفل اسود وكمون وتقفلى الحلة كويس ولما الصفارة تلف هتوطى عليهم النار لمدة ساعة الا ربع برضه ولما تطفى النار والحلة تبرد هتطلعيهم يبردوا فى مصفى والشوربة بتاعتهم بتتشرب


اللسان بعد ما يبرد هتلاقى عليه قشرة بيضا دى بتتقشر من عليه هتاخدى كل حاجة منهم وتقطعيها شرائح وتقلبيهم على بعض كلهم فى طبق كبير هتحطيهم فى طاسة تيفال مع نقطتين زيت بس وتحطى عليهم رشة ملح خفيف وكمون وفلفل اسود وشطة لو حابة وتشوحيهم على النار وتستمرى فى التقليب لحد ما اللون يغمق شوية
__هتحضرى لكل واحد من الأسرة رغيف بلدى متسخن وتسخنيه على الحاجات وهيا بتتشوح من وش العيش وضهره وتفتحيه من النص وتحطى فيه كمية من الحاجات المتشوحة وبيتقدم كده فى الطبق وبالهنا والشفا….