البورصة ليه بقولك تبعد عنها ؟!

.
السنة اللي فاتت واحد قريبي من مهووسي البورصة شاف شركة واعدة عاملة اكتتاب .. فقرر يشتري اسهم بمبلغ كبير جدا .. يمكن يزيد عن ربع اللي حيلته ..
.
قلتله انفد بجلدك .. الاكتتاب مجرد قشة ما قبل الغرق .. وعرفت كدا ببساطة لاني كنت معجب جدا بمعدلات نمو الشركة دي لدرجة اني شكيت انها غسيل اموال ( زى ما بيشاع عن معظم المشاريع اللي تحقق نمو كبير ) ..
.
فقلت اشوف ايه حدوتها يمكن استفيد بتجربتهم ..
من شوية بيانات كدا استنتجت علي طول انهم شغالين باستراتيجي بنسميها في البيزنس Blitzscaling .. وبالرجوع لاعمال المؤسسين قبلها .. فكان مستحيل اصدق انهم يملكوا المبالغ اللي تم ضخها دي كلها .. ودا معناه انهم اقترضوا عشرات او مئات الملايين ..
.
بنفس الطريقة اللي استخدمتها معاكم قبل كدا علشان اوصلكم معلومة في البيزنس واقنعكم بيها .. قعدت مع قريبي دا وفتحت اكسل شيت .. دخلتله مجموع البيانات المعلنة عنهم .. مع شوية شغل محاسبة .. اقتنع انهم في ورطة وانه بشراكته هيورط نفسه معاهم ..
.
خلال الشهر اللي فات الشركة فقدت من قيمتها السوقية ما يزيد عن التلت .. واعتقد هتفقد نفس القيمة خلال سنة بالكتير .. واللى اشتري السهم بجنيه هيبيعه ب 30 قرش ..
.
بحكيلك الحدوتة دي علشان مترميش نفسك في النار ورا حلم الثراء السريع ومتسمعش لاشتغالات شركات الوساطة والكورسات بتاعة ( افهم بورصة في 3 ايام ) ..
وبفكرك انك ممكن تبقي تنين بيزنس واشطر مني مليون مرة ويتحط عليك لظرف طارىء يضرب السوق .. زى ما حصل مثلا سنة 2008 لما وقعت البورصة بسبب الازمة الاقتصادية العالمية ودا خلي واحد من اشطر مضاربي البورصة يخسر كل فلوسه لدرجة انه عجز يوفر تمن علبة اللبن البودرة لابنه فقتل اولاده و زوجته ظنا منه انه كدا بيرحمهم من عذاب الدنيا ..