أفتكر إني في فيلم “في بيتنا رجل”.. وفي كل مرة أشوفه، الأدرينالين بيعلى عندي وأنا بشوف المشهد ده، علشان رشدي أباظة ميشوفش عمر الشريف، رغم إني عارف كده كده إنه هيتقفش.
الحالة الفنية اللي بتخليك مشدود ومنفعل مع الصورة اللي بتشوفها، مؤكد إن وراها مبدعين ومجهود كبير علشان تحسها، وبالتأكيد مخرج بحجم هنري بركات، كان قادر على ده.
لفتني نفس المشهد تقريبا في مسلسل “علاقة مشروعة”، لما كان ياسر جلال قاعد مع مراته في الفيلا، وجالها طليقها اللي بيحاول يرجعلها واللي هو في نفس الوقت صاحب العمر وشريك ياسر جلال، فبيستخبى ورا الباب، فضلت مشدود وتذكرت نفس الإحساس بتاع “في بيتنا رجل” بنفس القوة والأداء مع اختلاف تكوين الصورة طبعا.
وده بيؤكدلي إن المخرج خالد مرعي فنان قدير لأنه عامل مسلسل كله شد أعصاب، بيحترم عقل المشاهد وفيه رسالة اجتماعية جميلة.
مسلسل علاقة مشروعة، مسلسل مصري، مصنوع بحرفية وسلاسة من غير حزق ولا أي فزلكة، بعتبره مفاجأة الموسم.
التعليقات مغلقة.