علاقة الجرائم البشعة اللي حصلت مؤخراً بمنع موسم الحج الأخير وبحفلات روبي وتامر عاشور وحسني الأخيرة!
إيه علاقة الجرائم البشعة اللي حصلت مؤخراً بمنع موسم الحج الأخير وبحفلات روبي وتامر عاشور وحسني الأخيرة!
عايزك كدة معايا تفكر وتراجع نوعية الجرائم اللي سمعتها في آخر فترة وطبيعتها كدة وفكر هل هي جرائم تقليدية سرقة وقتل وزنا ولا الموضوع تطور وبقى فيه وحشية وأمور ما كانتش تخطر على عقل بشر؟.
كام جريمة قتل سمعتها عن أب وأم قتلوا ولادهم آو العكس؟
طب كام جريمة تحرش واغتصاب وزنا بين المحارم ؟
كام طفل رضيع لقيوه مرمي في الزبالة ميت؟
كام جريمة دياثة مقززة من أزواج تجاه زوجاتهم ؟
كام جريمة قتل سادية بين الأزواج كأنهم بينتقموا من بعض؟
طب بعيدا عن الجرايم دي وخلينا في حياتنا العادية.. حياتي وحياتك أنت.
مش ملاحظ انتشار الإحباط والكآبة في كل حاجة حواليك؟
العصبية والخلق الضيق والخناق والخصام وانعدام الشغف مش بقى ده العادي بتاع اليومين دول ؟
تمام أنت عايز توصل لايه من كل ده برضو..ايه علاقة كل ده ببعضه ؟
سمعت قبل كدة عن مصطلح الطاقة السلبية والطاقة الإيجابية؟
كل شيء في الكون عبارة عن طاقة جسمك ده لو فككته لأصغر هيكل في الخلايا هنلاقيه عبارة عن نوايا والكترونات وبروتونات, وده معناه ان الإنسان نفسه في جوهره بيتكون من الطاقة.
العالم والكون كله حوالينا عبارة عن طاقة والإنسان عبارة عن ناقل للطاقة وده معناه انه ممكن التأثير علينا من خلال الطاقة الموجودة حوالينا, والأهم من ده اننا نقدر نأثر على الطاقة اللي حوالينا برضو فنقدر نصدر طاقة ايجابية أو طاقة سلبية, وبرضو نقدر نتأثر بطاقة ايجابية أو سلبية.
عشان تفهم ده بشكل مبسط كلنا مؤمنين بوسوسة الشيطان لكن هل هي وسوسة مادية؟ يعني واحد بيجيلك في ودنك والله اعمل كذا ومتعملش كذا؟
ولا إحساس بتحسه بيهألك فعل المعصية ويزينها او يخليك تعملها وأنت في أقصى درجات عصبيتك وعدم اتزانك.
هل كل شيء في الكون مادية بحتة؟
يعني السحر ده عبارة عن إيه؟
الحسد عبارة عن إيه؟
في المقابل الأذكار اللي بتحفظك من كل ده عبارة عن إيه.
كلام وأفكار وعقيدة بتتحول لطاقة إما طاقة سلبية مؤذية أو العكس.
الكون عبارة عن طاقة إيجابية وطاقة سلبية وفي حالة توازن وهنعرف مع بعض مصادر كل طاقة.
فاللي عايز اقوله باختصار إن العلاقة بين كل ده الخاصة بالكام سؤال اللي سألتهم في الأول هو إنتشار الطاقة السلبية في الجو المحيط بينا وتقولها الكاسح على الطاقة الإيجابية واللي بقينا بتنتفسها ليل نهار..لكن الأخطر لما نعرف ان الطاقة السلبية اللي أصابت الجميع بلا استثناء دي بفعل فاعل…طب أزاي ؟
مين مصلحته إصابة البشر بكل هذه المشاعر السلبية؟ اتباع الشيطان من الانس والجن ودول موجودين في كل مكان وزمان.
وبالمناسبة موضوع الطاقة السلبية في الجو ده مش غاز بينشروه في الجو فاللي يشمه يتجنن ولا اشتاتا اشتوت فتحضر الطاقة السلبية لا دي ليها طرق معينة هنتعرف عليها مع بعض.
أماكن ارتكاب المعاصي مصدر مهم لنشر الطاقة السلبية وكل ما كترت وكبرت المعاصي وعدد مرتكبيها في مكان واحد كل ما كان المكان مصدر لنشر الطاقة دي في الكون كله.
كباريه فيه خمرة ورقص ودعارة مكان جميل جداً يبرطع فيه الشيطان وأعوانه ويبث طاقته السلبية في الجو.
كمان فيه تعمد لانهم يقدروا بيبثوها الطاقة والأفكار السلبية دي بأجهزة معينة وبتوصل لخلايا المخ في هيئة ترددات غير مسموعة وغير مرئية وبتؤثر على المخ تدريجياً واحدة واحدة وبتتراكم في النفس لحد ما تحوله لكائن محبط ولو زادت بنسبة معينة بتؤدي لسيطرتهم وتحكمهم الكامل في الشخص.
شرحنا ده في مقالات التحكم في العقول ومشاريع المخابرات الأمريكية اللي اعترفت بيها كمان شرحت ده في مقال خاص في ما وراء أغاني الروك والميتال وقدرتها على التخلخل في العقول من غير ما نكون واخدين بالنا وبتكون عبارة عن رسائل هي اوامر وتوجيهات للعقل الباطن مش بيدركها العقل الواعي ولكن آثارها بتكون مدمرة.
طب الطاقة دي بتيجي لينا أزاي ؟ هل في الجو بس ؟ لا للأسف ده في التلفزيون والتليفون وفي كل مكان حوالينا من أفلام وفيديوهات وأغاني ووو.. وجرب هتلاحظ شعورك بانقباض معين او احساس بالكآبة والإحباط والسواد بعد رؤيتك لفيلم معين او سماعك لاغنية معينة.
طب الطاقة السلبية إيه المعادل ليها فين الطاقة الايجابية اللي بتوازنها في الجو والبيوت ؟
المناسك الدينية الجماعية زي صلاة الجماعة وصلاة الجمعة صلاة التراويح والعمرة والحج سبب رئيسي لخلق التوازن ده… واللي بالصدفة إنهم تقريبا كلهم تم الغائهم في آخر كام شهر واللي حصل فيهم زيادة الطاقة السلبية وعلاماتها اللي ذكرناها ..هل تعتقد أنها مجرد صدفة فعلا ؟ ومين اللي كان ورا قفل المساجد وإلغاء المناسك دي بعينها على مستوى العالم في وقت واحد…ومتتذاكاش وتقول بسبب كورونا اللي اتضح أنها مجرد حجة وقناع مزيف ليس إلا لإلغاء الحاجات دي ( مقصدش ان الكورونا نفسه وهم اقصد استخدامه كفزاعة وحجة)
بدليل أنه في نفس الوقت في نفس البلد اللي تم تقليل عدد الحجاج من 2 مليون ل 60 ألف بس شغالة فيها حفلات بقالها 5 أسابيع متواصلة لأشهر مطربين الوطن العربي بحضور جماهيري مكثف.
ده غير حفلات روبي وتامر حسني اللي متعرفش تحط رجلك من تزاحم الجماهير فيها.
حفلات بتنشر طاقة سلبية مقابل تحجيم أكبر مصدر للطاقة الإيجابية في الكون هو الحج.
الطواف حوالين الكعبة عكس عقارب الساعة بعشرات الآلاف من البشر مش طقس عادي بلا معنى ده مكان بيدي الشخص طاقة روحانية عالية بتخلي روحه نقية كيوم ولدته أمه وبيينقلها للكون كله.
سبحان الله أغلب الجرائم البشعة دي في أيام الحج والعيد أكبر وقت شهد انخفاض الطاقة الإيجابية وزيادة الطاقة السلبية بشكل ملحوظ.
كمان أداء الصلاة في وقتها وإطالة السجود بتخلص الجسم من جميع الشحنات السلبية وبيتخلص الجسم بشكل أكبر من الطاقة السلبية في صلاة الجماعة اللي بتتحول فيها الطاقة السلبية لإيجابية وبتتجمع بشكل أكبر كل ما زاد عدد المصلين فتنبعث بشكل أكبر للكون وتستقبل أجسام المصليين طاقة ايجابية مرتدة من ألكون ( قانون ألجذب )
طب تمام نعمل إيه عشان نقلل الطاقة السلبية دي ونقاومها ؟ حافظوا على الصلاة عموماً وخاصة صلاة الجماعة.. شغلوا قرآن كتير أغلب الوقت في بيوتكم قللوا سماع أغاني وأفلام وتلفزيون وتليفون قدر الإمكان ..حافظوا على أذكار دايما.. رشوا معطر جوي في البيوت استعيذوا بالله من الشيطان وجنده دايما.
وده مش استشياخ مني قدر ما هو علاج ليكم لو شايفين ومقتنعين ان اللي فات ده صحيح.
الطاقة السلبية هي اللي تخلي زوج يطعن زوجته 11 طعنة قدام ولادها.
هي اللي تخلي زوج يطعن مراته عشرات الطعنات زي ما مصوراه الكاميرات لمجرد أنها رفضت تصالحه.. مش معقول الغل اللي كان جواه وهو بيطعن فيها حتى بعد ما ماتت.
هي اللي تخلي واحدة تقتل طفل عشان فلوس جمعية.
هي اللي تخلي أب يقتل ابنه وابن يقتل أمه وعم يقتل بنت اخوه وأخ يقتل عيال اخوه!
كل نفس جواها الخير والشر والطاقة السلبية هي وقود الشر ده.
أما لو حضرتك شايف اللي فات ده تخاريف وهبد ونظرية مؤامرة واكلة دماغي فاقرأ عن الحاجات المذكورة في المقال دي بتمعن خاصة موضوع السحر الأسود والطاقة السلبية والطاقة الكونية بشكل عام والسيطرة على العقول واهمية مناسك الحج كمصدر للطاقة الروحانية وفي النهاية من حقك تتبني وجهة النظر اللي ترضيك وتريحك ده أبسط حقوقك.. أنا مش بجبرك تقتنع بكلامي اللي هو عبارة عن وجهة نظر كونتها بعد بحث في الأمور المذكورة في المقال مش من فراغ يعني.
التعليقات مغلقة.