وفاه الفنان الكبير سمير صبري مش محتفظ في ذاكرتي لـ سمير غير إنه كان راجل مُبهج والضحكة مش بتفارق وشه عمري ما سمعت ومش فاكرة إنه دخل في

44

من لحظات إتوفي الفنان الكبير “سمير صبري “.. مش محتفظ في ذاكرتي لـ “سمير” غير إنه كان راجل مُبهج ، والضحكة مش بتفارق وشه .. عمري ما سمعت ومش فاكرة إنه دخل في مشكلة مع أى حد لا في الوسط الفني ولا بره .. أغاني زى “أضحك يا أبو علي”، و”سكر” بتخليك تشوف جزء من شخصيته اللي مش شايلة هم للدنيا وشايفاها في منظورها الحقيقي إنها مش مستاهلة ..

عمره ما ساب حد في ظرف صعب إلا وساعده .. “نور الشريف” في لقاء ليه مع “هالة سرحان” أتكلم وقال إن “سمير” هو الوحيد اللي كان بيسأل عنه في أزمة صعبة مر بيها “نور”!.. مفيش عزاء أو فرح أو أزمة مش هتلاقي فيهم “سمير” من أول الموجودين ..

عادي جداً كنت تشوف “سمير” موجود في عزاء بسيط جداً في منطقة شبرا ولما تسأل ده عزاء مين تعرف إنه عزاء راجل نجار بسيط بس “سمير” شاف العزاء فقرر ينزل من العربية يجبر بخاطر الناس ويعزي !.. فنان قدير ، ومثقف ، وصاحب واجب من زمان ، وبشكل شخصي أعرف مواقف جدعنة كتير كان هو البطل فيها بدون ما يهتم إن ده يتم إعلانه ..

بيموت الإنسان ومش بيفضل بعده غير سيرته الحلوة ، و”سمير صبري” من اللي سيرتهم ارتبطت بالبهجة والسعادة
.. ربنا يرحمه ويغفرله ويرزقه الجنة.