ما هو التطور؟

255

ما هو التطور :-
ببساطة هو عبارة عن التغير في السمات الوراثية للكائنات الحية عبر الأجيال وبينقسم لنوعين :
1- التطور الصغروي Microevolution
2- التطور الكبروي macroevolution
التطور الصغروي Microevolution
هو ببساطة تغيير ترددات الأليلات في الحوض الجيني لمجموعة سكانية معينة يعني بيحصل فيه تغيرات دقيقة بتتم على المستوى الجيني وبتحصل في فترات قصيرة جداً ويمكن إثبات حدوث التطور الصغروي رياضياً على ورق والكلام دا بيتم بمعادلات رياضية بحتة زي معادلة هاردي و واينبرغ اللي بنقدر من خلالها نحسب معدل التكرار او التغير في تردد الاليلات Allele frequencies الموجوده في حوض جيني لمجموعه معينه من الافراد (عشان الناس بتوع التطور ليس حتمية رياضية ! )
والتطور الصغروي دا بيحصل من خلال 4 عوامل رئيسية :-


1– حدوث الطفرات Mutations
2- الهجرة أو التدفق الجيني Gene Flow
3- الإنحراف الجيني Genetic drift
4- الانتقاء الطبيعي Natural Selection
أول ثلاثة عوامل (الطفرات والتدفق الجيني و الإنحراف الوراثي ) بيتموا بصورة عشوائية تماماً
إنما الإنتقاء الطبيعي Natural Selection مش عشوائي وهو اللي بيوجه وينتقي باقي العوامل وبيتحكم وبيختار صفات معينة عشان تكمل !!
والحقيقة فيه سوء فهم عند بعض الناس عن الانتقاء الطبيعي وهي فكرة البقاء للاقوى وطبعا دا غلط تماما لأن الإنتقاء الطبيعي نفس فكرة انتخاب الشعوب لشخص معين عشان يمسك منصب بناء على مجموعه من الصفات فيه تؤهله انه يكمل في المنصب دا
بس الفرق ان اللي هيختار هنا وواللي هيحدد هتكون الطبيعه وطبعا الطبيعه معندهاش كوسة الطبيعه هتختار الكائنات اللي عندهم الصفة الانسب او بمعنى اصح الاصلح للبقاء مع الظروف البيئية وبيكون للاشخاص دول فرصه اكبر في تمرير جيناتهم عبر الاجيال يعني اللي عنده القدرة على التزاوج وتمرير جيناته بمعدل اكتر من غيره و هو ده اللي نوعه هيكمل للاجيال اللي جاية بعكس الافراد التانيين اللي نسبتهم بتفضل تقل تدريجياً لحد ما ينقرضوا !

=أفضل مثال موثق على حدوث الانتقاء الطبيعي في البشر هو فقر الدم المنجلي Sickle Cell Anemia :
فقر الدم المنجلي عبارة عن مرض وراثي وهو شكل غير طبيعي من الهيموجلوبين ينتج عن طفرة استبدال نقطية حصلت في الجين المساهم في تكوين جزيء الهيموجلوبين ودا البروتين الأساسي اللي بيدخل في تكوين كريات الدم الحمراء اللي وظيفتها الاساسية هي حمل الأكسجين ونقله من الرئتين إلى جميع خلايا و أنسجة الجسم المحتلفة ونتيجة لحدوث الطفرة دي بيتغير شكل كرات الدم الحمراء وبيصبح شكلها منجلي sickle-shaped غير قادرة على حمل كميات كافية من الاكسجين
الاشخاص الاصحاء بينتجوا هيموجلوبين الطبيعي بيكون متحكم في انتاج الصفة دي عاملان متامثلان او فرد نقي متجانسة اللاقحة homozygous (AA)
لكن في حالة الأشخاص المصابون بفقر الدم المنجلي

  • اما يرثون الأليل S من كلا الوالدين وفي الحالة دي بيكون المتحكم في ظهور الصفة دي عاملان متامثلان او فرد نقي متجانسة اللاقحة homozygous (SS) ودي اخطر حالات فقر الدم المنجلي
  • أو يرثون نسخة واحدة من كل أليل وفي الحالة دي بيكون المتحكم في ظهور الصفة دي عاملان وراثيان مختلفان متباين اللاقحة heterozygous (AS) يعني بينتجوا خليط من الهيموجلوبين الطبيعي والغير طبيعي ودي بتبقى اقل خطورة
    السؤال المهم هنا بقى مش المرض دا ضار ؟
    -اه ضار
    طب ليه موجود بنسبة عالية في بعض الأماكن زي غرب ووسط إفريقيا ليه الانتقاء الطبيعي مقضاش على الطفرة الضارة دي لحد الوقتي ؟
  • الاجابة هي ان الإنتخاب الطبيعي بينتقي الصفة اللي هتخليك تsurvive بغض النظر عن كون الصفة دي ضارة او لا
    الأشخاص مثلاً اللي بيعانوا من فقر الدم المنجلي عندهم مقاومة أكبر من الأشخاص العاديين ضد مرض الملاريا
    ودا لأن الأشخاص المصابون بالخلايا المنجلية لديهم بعض خلايا الدم الحمراء منجلية الشكل غير قادرة على حمل كميات كافية من الاكسجين ودي تعتبر بيئة غير مناسبة لطفيل الملاريا
    هنا الملاريا بتمثل عامل انتقائي يفضل وينتقي النمط الظاهري متغاير الزيجوتAS لأن الأشخاص اللي بيعانوا من فقر الدم المنجلي هينجحوا في تمرير جيناتهم وبالتالي تمرير الطفرة المسببة لفقر الدم على العكس من الاشخاص اللي بينتجوا هيموجلوبين طبيعي واللي غالباً بيموتوا بسبب الملاريا.