ميكب ارتيست غسلت وش العروسه لانها حاجزه سواريه مش خطوبه

861

عروسة في المحلة حجزت عند كوافيرة سواريه ” يعني ميك أب سهرة ” بتكون تكلفته أقل، فاكتشفت إن النهاردة خطوبتها والعريس وصل تحت الكوافيرة اضايقت و ازاي متحجزيش ميك أب خطوبة ” إللي هو أغلى ” و قامت غاسلة لها وشها و مبوظة كل الميك أب إللي عملته و نزلتها لعريسها كدة السؤال، ايه شعور البنت العروسة فى الوقت دة ! ايه احساسها انها مش قادرة تدفع سعر أغلى وعايزة تفرح !

ايه إحساسها واليوم كله باظ منها بسبب انها هتجيب حد تاني منين دلوقتي والوقت و عريسها واقف لها تحت ! فى حين إن الخامات والأدوات والمجهود إللي اتعملوا هى دفعت سعره بالفعل، أنا اشتريت منك قلم جاف أنت مالك هكتب بيه طلبات البيت ولا رسالة دكتوراة ايه الفرق بالنسبة لك !

من رأي لو الكوافيرة دي اشتغلت بعد كدة فى المحلة وناس راحت لها تاني يبقى لا عندهم شعور ويستاهلوا إللي يحصلهم وربنا يحنن قلب عبيده على عبيده عشان الوضع بقى صعب كدة.