ليه الدايت صعب في الاجازات هو في العادي اصلا صعب بس في الاجازات بيكون اصعب
السبب الاساسي لده اننا كسرنا الروتين

132

في الاجازات بيكون صعب نمشي علي الدايت ١٠٠٪؜, هو في العادي اصلا صعب بس في الاجازات بيكون اصعب،
السبب الاساسي لده اننا كسرنا الروتين، مفيش مواعيد لاي حاجة، كل حاجة بتتغير.
واصلا مهم جدا للحفاظ علي اي عادة ان يكون في روتين.

بس في عادتين اساسيتين مش مفروض نكسرهم ابدا في الاجازات.

اول عادة هي عادة السناكس او الاكل طول اليوم.
لو كانت عندك العادة دي زمان وقطعتها، هاتبقي عارف قد ايه دي حاجة صعبة.
لما بنرجعلها في الاجازات، بعد الاجازة بيكون صعب جدا جدا جدا نبطلها.
وبنرجع تاني نتعود علي الاكل طول النهار.
ده غير ان وقف السناكس في الاجازات هايزود حرق الدهون ويعوض ضرر الاكلات اللي مش صحية.

العادة التانية انك لازم تفضل مزود بروتين.
لو بوظت الدايت وقعدت تاكل دهون ونشويات بس، زي المعجنات مثلا، ده اسوأ حاجة ممكن تعملها.
الافضل بكتير، هو اني حتي لو هابوظ، يفضل البروتين عالي، عشان ده هايخليني شبعان، وهايحافظلي علي الكتلة العضلية، وده هايقلل ضرر الاجازة.