طريقه عمل الكشري الإسكندراني….

255


نجيب من المحل بتاع البقالة
عدس اصفر و رز مصرى وينفع بسمتى وبيض وكيس بصل وعلبة صلصة وشوية طماطم
بس كدة
نقطع البصلة وفى حلة على النار ننزل بزيت ونحمر البصلة لحد ماتبدل بس وبعد كدة ننزل بالعدس على طول بعد البصلة علشان يتحمر معاها وياخد لون اصفر حلو كدة واول ما يتحمر العدس ننزل بالرز وزى ما قولنا قبل كدة معيار الرز كل كوباية ليها كوبايتين ماية نتبل بقى ملح مكعب ماجى شوية فلفل اسود رشة كمون صغيرة فصين توم مهروسين وشكرا ونقلبه تقليبة ونغطى وستنى لحد ما يستوى هياخد على نار واطية حوالى ٢٥ دقيقة بس كدة لا استنى والبيض والصلصة والطماطم ياعم فاكر فاكر البيض هنسلقه ومش هقولك ازاى علشان ده سر
انما الصلصة والطماطم بقى نعمل بيهم صلصة كدة تترش
فصين توم وفى حلة نونو ونحمرهم وننزل عليهم بمعلقة خل ومعلقتين صلصة كبار او عصير طماطم بس هياخد وقت على ما يبقى صلصة ونحط شوية ملح وفلفل اسود وشطة حسب الزوق ونزود شوية ماية يغلو شوية ويتعرفو على بعض نكون مقطعين طماطماية فى طبق ونصب عليها الصلصة دى وشوية توم مهروس تانى فصل كدة وشوية كمون ورشة كزبرة وعصرة لمونة او شوية خل وخلاص اه خلاص طب وباقى البصل ياعم انت مش ناسى والله هنعمل بصل محمر بيه طب ازاى يا ابنى اصبر شوية انت مستعجل ليه
نقطع البصل جوانح كدة ونلفه بمعلقة دقيق ونشا وملح وندعكو فى بعضه ونسخن زيت كتير ونقلى فيه البصل بس خلى بالك علشان بيفور وخليك مركز مع البصل علشان بيتحمر بسرعة واوع تنسى البيض الاى بيتسلق ولا الرز
وكله كدة استوى وبقى تمام تعالى نجمع بقى اغرف الرز فى طبق وقشر البيض وازرعه فى الرز واسقيه بالصلصة وجرنشه بالبصل المحمر وناولنى معلقة يا ابو الصحاب
اه وفى ناس بتدحرج البيض وتحمره مجربتوش بس سمعت عنه وشوفته وده عبارة معلقة زبدة وحط البيض يتحمر فيها ورش شوية ملح وفلفل اسود وشكرا….