سبب ركودك في التجاره وقله المبيعات

32

صديق عزيز كنت بكلمه امبارح واشتكالي من ضعف مبيعات المحل عند
.
سألته عدة أسئلة استكشافية لتكوين صورة سريعة عن الواقع عنده
.
صديقي العزيز مستسلم لفكرة انه عمل اللي عليه وان المشكلة في السوق
.
قلت له : هكرر عليك جملتي المفضلة = لكل ركود خلطته
.
انت عافرت شويه ولما المعافرة ما جابتش نتيجة = استسلمت لفكرة ان العيب في السوق أو لفكرة إن مافيش فايدة = غلب حماري
.
هقولك جملتي المفضلة التانية = فيه ناس شغالة كويس في عز الأزمات
.
مش بس كده = فيه ناس طفرة عمرها التجارية كانت في الأوقات الصعبة في السوق
.
هقولك جملتي المفضلة التالتة = الناس مش هتبطل تشتري بس هتبدأ تغير سلوكياتها في الشراء = وفي الأزمات في الغالب الناس بتعيد ترتيب أولوياتها وكمان بتتجه لشراء الأرخص
.
هنا انت قدام حاجة م اتنين = تلعب على الأرخص في مجالك مع تقديم جودة مقبولة ودعاية مكثفة

أو لو مجالك ترتيبه في أولويات المستهلكين متأخر = فممكن تنتقل بحذر شديد لسلع او خدمات متقدمة على سلم أولويات الناس ( زي الأكل مثلا )
.
بص يا صاحبي لما تعافر وتلاقي ما فيش نتيجة = يبقى لازم تغير في عناصر و مقادير الخلطة
.
فيه خلطة سحرية كل شغلانة ولكل ركود ، الخلطة دي هتوصلها بطريقة من اتنين = حد جدع وشاطر يمتلك الخلطة ويديهالك أو تفضل تغير في العناصر والمقادير لحد ما توصلها بنفسك
.
أخيرا عاوز اذكر مثال عبقري عن موضوع تغيير عناصر الخلطة اللي ممكن توصل لاختراع وابتكار فكرة أسطورية تشغل مشروعك ١٠ سنين قدام
.
المثال ده ذكره الكاتب العظيم فهمي هوبدي في كتاب ( مصر تريد حلا )

هو ذكره كدليل على إن الدول الكبرى لا تقدم المعونات للدول الفقيرة بدافع التنمبة أو النهوض بل بدافع الاسترقاق وانتقاص سيادتها وفي مجالات تعود بالنفع الاقتصادي على الدولة التي تقدم المعونة
.
الأستاذ فهمي بيحكي ان اليابان في ستينات القرن الماضي قدمت معونات مالية ضخمة لاندونيسيا بشرط واحد فقط = ان يتم انفاق هذه المعونات في مجال واحد فقط = رصف الطرق
.
بعد سنوات قليلة صارت اندونيسيا من أكبر مستوردي السيارات اليابانية في العالم
.
أختم بجملتي المفضلة الرابعة = الأفكار الناجحة حواليك بس انت مش شايفها علشان نظرك ضعيف أو مش مركز ، البس عدسة مكبرة أو غير النضارة هتشوف الحلول المبتكرة والفرص اللي منتظرة واحد لماح ياخد باله منها
.
الجماعة النحاتين بيقولوا إنهم ما بيخترعوش التمثال من العدم = التمثال موجود وهم كل شغلتهم يزيلوا الأجزاء الزيادة من حواليه